Bizde tehnologııalyq táýelsizdik joq — Kúnsulý Zakarııa

ASTANA. KAZINFORM — Senatta ǵylymı-tehnıkalyq qyzmetti damytý máselesine arnalǵan kezdesý ótip jatyr. 

Jıynda sóz alǵan QR Prezıdentiniń ǵylym jáne ınnovatsııalar máseleleri jónindegi keńesshisi Kúnsulý Zakarııa qatysýshylardy Memlekettik rámizder kúnimen quttyqtaı kelip, ǵylymnyń kenje qalyp jatqan salalaryna toqtaldy.

— Memlekettik rámizder kúnin jyl saıyn atap ótip júrgenimiz — táýelsizdigimizdiń belgisi. Degenmen shekaramyz ben tilimiz, Konstıtýtsııamyz ben rámizderimiz bolǵanymen, tehnologııa jaǵynan bizde áli táýelsizdik joq. Tehnologııalardy, kóptegen ónimdi biz syrttan ákelemiz. Ol bárińizge málim. Qazirgi tańda ǵylymdy damytý Qazaqstan úshin basym baǵyttardyń biri ekenin bilesizder. Sebebi ǵylym — ekonomıkanyń ósýine yqpal etetin, jańa jumys oryndaryn ashatyn, azamattardyń ómir sapasyn jaqsartatyn tehnologııalyq ınnovatsııalardyń negizi, — dedi ol.

Ǵalym elimizde ǵylym sońǵy jyldary aıtarlyqtaı ilgerilegenin aıtady. 

— Ǵylymı uıymdardy jańǵyrtý sharalarynyń, shetelde taǵylymdamadan ótýshilerdiń sany birte-birte artyp keledi. Bul ǵylymdy jańa urpaq úshin tartymdy etip otyr, — dedi Kúnsulý Zakarııa.

Aıta keteıik, búgin Gúlzat Kóbenova QR ǵylym jáne joǵary bilim vıtse-mınıstri laýazymyna taǵaıyndaldy.