Biz jurttan kósh ilgeri júretin el bolamyz - Prezıdent «Jańa adamdar» jastar forýmynda sóz sóıledi
ASTANA. KAZINFORM — Forýmda «Jańa adamdar» qozǵalysynyń jetekshisi Ásel Badenova Prezıdentke uıym qurylǵaly beri qozǵalystyń atqarǵan ıgi isteri men azamattyq bastamalaryn tanystyrdy.

Onyń aıtýynsha, qazirgi kezde qozǵalystyń 19 qalada kampýsy, 15 myńǵa jýyq belsendi múshesi bar. Qozǵalys elimizde ondaǵan azamattyq bastamalar men aktsııalardy uıymdastyryp úlgergen. Jastar vandalızmmen, ruqsat etilmegen jerge qoqys tógýshilermen, kámeletke tolmaǵan balalarǵa ishimdik satýshylarmen, esirtki taratýshylarmen jáne basqa da áleýmettik keseldermen kúres júrgizip, ózderiniń azamattyq ustanymdaryn ashyq ári belsendi bildirip júr.
Memleket basshysy forýmǵa jınalǵan jalyndy jastardyń boıyndaǵy Otanǵa, elge degen súıispenshilik pen qurmetke rızashylyǵyn bildirip, kózi ashyq, kókiregi oıaý azamattardyń ár jetistigine qýanatynyn, ár bastamasyn qoldaıtynyn jetkizdi.
– Qazaqstannyń jastary – jasampaz. Men muny únemi aıtyp júrmin. Jańa ǵana óte jaqsy oılar aıtyldy. Tyń ıdeıalar, ıgi bastamalar bar. Sizderdiń sózderińizdi tyńdap, forým atmosferasyn sezine otyryp, keýdemdi maqtanysh kernedi. Qazaqstannyń bolashaǵyna degen senimim nyǵaıa tústi. «Jas kelse – iske» dep beker aıtpaǵan. Elimizdiń keleshegi oıy ushqyr, bilimi tereń, kózqarasy zamanaýı jastardyń qolynda. Men Prezıdent retinde Sizderge zor úmitpen qaraımyn, – dedi Qasym-Jomart Toqaev.

Prezıdent qazir elimiz úshin tarıhı kezeń ekenine, aldymyzda bıik maqsattar turǵanyna nazar aýdardy.
– Biz jurttan kósh ilgeri júretin el bolamyz. Úırenetin de, úıretetin de ult bolamyz. Jastar barlyq ózgeristiń bastaýynda turady. «Jańa adamdar» – jańa qoǵamnyń aınasy. «Jańa adamdar» – jańa bolmys! Bul – óz eline adal jastardyń qozǵalysy! Bizdiń strategııamyzǵa qoldaý bildirgen sizderge alǵys aıtamyn. Reformalarymyzdyń mán-mańyzy urandaryńyzda kórinis tapqan. Bul ózgerister Ádiletti Qazaqstandy qurý, «Zań men tártipti» qamtamasyz etý tujyrymdamasyna negizdelgen, – dedi Memleket basshysy.
Qasym-Jomart Toqaev jastarǵa qarata aıtqan sózinde otanshyldyq sezimge, qoǵamda «Zań men tártip» ústemdigin ornatýdyń mańyzyna, «Taza Qazaqstan» ekologııalyq aktsııasynyń ıdeologııalyq mánine toqtaldy.

Memleket basshysynyń pikirinshe, el úshin adal qyzmet etý jaýapkershilik alýdan qoryqpaıtyn, batyl azamattardyń qolynan keletin jumys.
– Jastarǵa barlyq múmkindikter jasalyp jatyr. Qazaqstan balalar men jastarǵa jan-jaqty qoldaý kórsetetin álemdegi az eldiń biri. Dúnıege kelgen ár sábı birden ulttyq baǵdarlamalardyń qatysýshysyna aınalady.
Ózderińizge málim, ekinshi jyl qatarynan Ulttyq qor tabysynyń bir bóligi balalardyń esepshotyna túsip jatyr. Kámelet jasyna tolǵanda olar jınaqtalǵan qarjyny oqýǵa nemese baspana alýǵa jumsaı alady. Bes jastan asqan balalarǵa arnalǵan «Keleshek» baǵdarlamasy iske qosyldy. Bul júıe ata-analar úshin óte qolaıly. Sol arqyly balalarynyń bolashaqta alańsyz bilim alýyna qarajat jınaıdy. Ár bala alty-jeti jastan bastap mektepte tegin bilim alady.
Munyń bári – memlekettiń mindeti. Biraq álemniń barlyq elinde dál osylaı emes. Bardy baǵalaý mańyzdy. Bizdiń jetistikterimiz barshylyq. Elimizde bastaýysh synyp oqýshylaryna tegin tamaq beriletin boldy. Oqýshylarymyz memleket esebinen ártúrli úıirmeler men sektsııalarǵa qatysa alady. Mektep túlekteriniń joǵary oqý ornyna nemese kolledjge grantqa túsý múmkindigi zor. Sońǵy jyldary grant sanyn aıtarlyqtaı ulǵaıttyq. «Bolashaq» baǵdarlamasymen myńdaǵan jas shetelde bilim alýda. Olar Qazaqstanǵa kelgen soń el damýyna úles qosady.
«Prezıdenttik jastar kadr rezervi» suranysqa ıe jobaǵa aınaldy. Keleshekte memleketti basqarýshylardyń negizgi legi osy jas mamandardan qalyptasady. Saıası reformalar aıasynda Májilis pen máslıhattarda jastar úshin arnaıy kvota engizildi. Bul ókildik bılik qyzmetine tyń serpin berdi. Osy jerge jınalǵan bilimpaz, otanshyl jastar máslıhattyń nemese Parlamenttiń quramyna kiretinine, tipti Úkimette jumys isteıtinine kámil senemin.
Jas kásipkerler men otbasylardy qoldaýǵa aıryqsha mán beriledi. Mysaly, bıznesti damytýǵa jáne baspana alýǵa jeńildikpen nesıe berý qarastyrylǵan. Bul balalar men jastardyń ómirden óz ornyn tabýyna jaǵdaı jasaýǵa baǵyttalǵan baǵdarlamalar men jobalardyń bir parasy ǵana, – dedi Prezıdent.
Memleket basshysynyń aıtýynsha, elimizde zaman talabyna saı bilikti mamandar óte kóp: muǵalimder, dárigerler, ǵalymdar, ınjenerler, ónerkásiptegi jumysshylar jáne basqa da mamandar bar. Qazaqstan jastary kreatıvti ındýstrııada da kóptegen tabysqa jetip jatyr.
– Sondaı daryndy azamattardyń arqasynda búkil álem jurtshylyǵy Qazaqstandy talantty ári eńbekqor adamdardyń eli dep tanıtyn boldy. Memleket kreatıvti ındýstrııanyń damýyna barynsha yqpal etedi. Qazir arnaıy qor qurylyp jatyr. Ol ádebıet, mýzyka, kıno, serıal jáne kompıýter oıyndaryna qatysty jobalardy júıeli túrde qoldaýmen aınalysady. Jastardyń qarym-qabiletin kórsetýine bul da bir keremet múmkindik.
Eń bastysy, adal eńbek etip, adal tabys tabý, ıaǵnı adal azamat bolý. Bıyl – «Jumysshy mamandyqtary jyly». Biz qoǵamda eńbek adamynyń abyroı-bedelin kóterip jatyrmyz.
Eńbek kýltin qalyptastyrý – asa mańyzdy mindet. Kez kelgen jumys – qadirli. Ásirese, jumysshy mamandyqtaryn ıgergen jastarymyz zor qurmetke laıyq, – dedi Memleket basshysy.

Qasym-Jomart Toqaev sózin qorytyndylaı kele, Qazaqstandy kórkeıtý qasterli paryz ekenin atap ótti. Berekeli birlik pen jastardyń jasampazdyq qýatynyń arqasynda Ádiletti Qazaqstandy birge quratynymyzǵa senim bildirdi.
Forýmda «Jańa adamdar» jastar qozǵalysynyń Almaty kampýsynyń jetekshisi Vladımır Izıýmnıkov, qozǵalystyń baspasóz hatshysy Alpamys Ábilov, «Tumar» azamattyq naýqanynyń jetekshisi Ǵalııa Týzen, «Halyq qahary» azamattyq naýqanynyń jetekshisi Álıhan Sársenov, «Antitrash» azamattyq naýqanynyń jetekshisi Baýyrjan Amanov sóz sóılep, Prezıdent Qasym-Jomart Toqaevtyń bastamasymen júzege asyrylyp jatqan reformalarǵa qoldaý bildirdi.
Aıta keteıik, buǵan deıin Jańa adamdar Kaspııdi qorǵaýǵa shaqyrady.