Biz ulttyq ónerimizben de týrısterdi tańǵaldyra alamyz – Roza Rymbaeva
BEIJІŃ. KAZINFORM – Qazaqstanǵa týrısterdi tartýdy tek nasıhattap qana qoımaı, qonaqtardy da kóbirek tartýymyz kerek. Bizde óte kórkem tabıǵat bar. Sol úshin eko týrızmdi barynsha damytýymyz kerek. Bul týraly Kazinform tilshisine Qytaıdaǵy Qazaqstan týrızmi jylynyń resmı ashylý saltanatyna kelgen Qazaqstannyń halyq ártisi Roza Rymbaeva aıtyp berdi.
«Bizde Qazaqstanda ásem, kórkem jerler óte kóp. Qazirgi tańda jarqyraǵan qonaq úılermen eshkimdi tańǵaldyra almaımyz. Damyǵan memleketterdiń qyzyǵýshylyǵy meniń oıymsha, ekotýrızm. Sol úshin naǵyz tabıǵatpen, tazalyqpenen týrısterdi tartý kerek. Bizdiń eń úlken baılyǵymyz – taza, kórkem tabıǵatymyz, ásem jerlerimiz, kólderimiz, taýlarymyz. Endi bizde ekotýrızm baǵyty damysa deımin. Bizdiń Qazaqstannyń kórkem tabıǵaty basqa jerde joq», - dep atap ótti ánshi.
Sonymen birge qazaqtyń ulttyq óneri ózge eshqandaı elden artyq bolmasa, kem emes ekenin de tilge tıek etti.
«Bizdiń ulttyq ónerimiz, ulttyq shyǵarmashylyǵymyz ózge elderden artyq bolmasa, kem emes. Dástúrli kúı, án-jyrymyz, bıimiz bar. Biz osy ulttyq ónerimizben de týrısterimizdi qyzyqtyramyz dep oılaımyn. Osy Qytaıdaǵy Qazaqstan týrızmi jylynyń resmı ashylý saltanatyna bir qazaqsha, bir qytaısha án oryndaımyn», - dep atap ótti ánshi Roza Rymbaeva.
Esterińizge sala keteıik, atalǵan is-sharada Qazaqstannyń halyq ártisi Roza Rymbaeva, QR eńbek sińirgen ártisi Maıra Muhamedqyzy, opera ánshisi Zarına Altynbaeva, «Ulytaý» etno-rok toby, Abaı atyndaǵy QazUOBT hor ujymy, «Serper» jáne «Sazgen sazy» ansamblderiniń shyǵarmashylyq ujymy bastaǵan 150-ge jýyq ónerpaz óner kórsetti.
