Tatarstannyń Qazaqstandaǵy barlyq bastamasyn qoldaımyz – Prezıdent

ASTANA. KAZINFORM – Memleket basshysy Tatarstan Respýblıkasynyń Raısy Rýstam Mınnıhanovpen kezdesý ótkizdi.

Qasym-Jomart Toqaev Rýstam Mınnıhanovty Tatarstan Respýblıkasynyń Raısy bolyp qaıta saılanýymen quttyqtap, Qazaqstan-Reseı qarym-qatynasyn, elimiz ben Tatarstan óńirleriniń ózara tıimdi seriktestigin nyǵaıtýǵa belsene atsalysqany úshin rızashylyǵyn bildirdi.

– 12 qarasha kúni Máskeýge memlekettik saparmen baramyz. Bul eki el qarym-qatynasyndaǵy aıtýly kezeń dep sanaımyz. Yntymaqtastyǵymyzdy odan ári damytýǵa tyń serpin beretin mańyzdy qujattarǵa qol qoıylady. Sizdiń Soltústik Qazaqstan jáne Qostanaı oblystaryn aralap kelgenińizdi bilemin. Qazaqstan aýmaǵynda kásiporyndar ashýǵa qatysty josparyńyz bar. Biz Tatarstanyń Qazaqstandaǵy barlyq bastamasyn qoldaımyz, – dedi Prezıdent.

Memleket basshysy mashına jasaý, munaı-gaz hımııasy jáne oǵan qajetti bólshekter shyǵarý salalarynda tabysty yqpaldastyq ornaǵanyn atap ótti. 

Prezıdent «KamAZ» jáne «Tatneft» kompanııalarymen birlesken ınvestıtsııalyq jobalarǵa basa mán berý qajet dep sanaıdy.

Rýstam Mınnıhanov Qazaqstanǵa shaqyrǵany úshin Qasym-Jomart Toqaevqa alǵys aıtyp, bıznes, ónerkásip, bilim berý jáne mádenıet salalaryndaǵy baılanystardy ilgeriletýge nıetti ekenin rastady.

Aıta keteıik, Memleket basshysy UQShU Bas hatshysy Imanǵalı Tasmaǵambetovpen kezdesti.