Biz saýda aınalymyn 15 mıllıard dollarǵa jetkizýge nıettimiz - Erdoǵan
ASTANA. KAZINFORM – Túrkııa Prezıdenti Rejep Taııp Erdoǵan respýblıkalyq referendýmda halyq qoldaýyna ıe bolǵan jańa Konstıtýtsııa Qazaqstannyń yntymaǵyn arttyra beretinine senim bildirdi, dep habarlaıdy Aqorda.
Sonymen qatar mártebeli meıman eki el arasyndaǵy qarym-qatynas keńeıtilgen strategııalyq áriptestik aıasynda barlyq salada nyǵaıyp kele jatqanyn aıtty.
– Qadirli baýyrymmen ótkizgen kezdesýde saýdadan bastap energetıka, qorǵanys ónerkásibi, kólik-logıstıka salalaryndaǵy yntymaqtastyq, sondaı-aq jahandaǵy ózekti máseleler sekildi kóptegen taqyrypta pikir almastyq. Biz saýda aınalymyn 15 mıllıard dollarǵa jetkizýge nıetti ekenimizdi rastadyq. Osy oraıda 15 sáýirde Astanada ótken Úkimetaralyq ekonomıkalyq komıssııanyń 14-shi otyrysynda qabyldanǵan 67 tarmaqtan turatyn Іs-qımyl josparyn júzege asyrýdyń mańyzyna toqtaldyq. Investıtsııa salasynda kompanııalarymyzdy yntalandyrýdy jalǵastyramyz. Búgingi bıznes-forým sııaqty iskerlik ortany biriktiretin is-sharalar eki eldiń saýda-ekonomıkalyq baılanystaryn nyǵaıtý turǵysynan asa mańyzdy dep sanaımyn, – dedi Túrkııa Prezıdenti.
Keńes otyrysynda Qazaqstan tarapynan Premer-Mınıstrdiń orynbasary – Ulttyq ekonomıka mınıstri Serik Jumanǵarın, «Samuryq-Qazyna» aktsıonerlik qoǵamynyń basqarma tóraǵasy Nurlan Jaqypov, Túrkııa tarapynan Syrtqy ister mınıstri Hakan Fıdan, Saýda mınıstri Bolat Omer baıandama jasady.
Aıta keteıik, búgin Memleket basshysy Túrkııa Prezıdentimen shaǵyn quramda kelissóz júrgizdi.
