Memleket adam úshin qyzmet etýi kerek - Respublica partııasy
ASTANA. KAZINFORM - Elordada Respublica partııasy aktıviniń keńeıtilgen otyrysy ótti, dep habarlaıdy partııanyń baspasóz qyzmeti.
Jıynǵa partııanyń saıası keńes músheleri, Parlament pen máslıhat depýtattary, áıelder jáne jastar qanatynyń ókilderi qatysyp, Qazaqstan Respýblıkasynyń jańa Konstıtýtsııasy jobasy jan-jaqty talqylandy.
Kezdesý negizgi zańǵa ortaq partııalyq ustanymdy qalyptastyrýǵa arnalǵan ashyq dıalog alańyna aınaldy.
Otyrysty ashqan partııa tóraǵasy Aıdarbek Qojanazarov usynylyp otyrǵan qujatty memlekettiń damýy úshin sapalyq turǵydan jańa kezeń dep baǵalap, talqylaýdyń baǵytyn aıqyndady.
- Búgin biz mazmuny tereń, máni bólek qujatty talqylap otyrmyz. Jańa Konstıtýtsııa - memleket pen azamat arasyndaǵy jańartylǵan qoǵamdyq kelisim, — dedi ol.
Tóraǵa qujatta ýnıtarly qurylym men aýmaqtyq tutastyqtyń myzǵymaı saqtalǵanyn erekshe atap ótti. Sonymen qatar jańa jobanyń ózeginde adamǵa baǵyttalǵan, azamattyń quqyǵy men qadirin aldyńǵy orynǵa qoıatyn kózqaras bar ekenin aıtty.
- Respublica úshin bul – qaǵıda. Biz memleket adam úshin qyzmet etýi kerek dep esepteımiz, - dep túıindedi Aıdarbek Qojanazarov.
Óńirlik partııa jetekshileri reformanyń praktıkalyq qyrlaryna toqtaldy. Qaraǵandy oblystyq fılıalynyń tóraǵasy Nurlan Áýbákirov ǵylym men ınnovatsııanyń Konstıtýtsııada bekitilýi joǵary tehnologııaly ekonomıkaǵa ótýdiń berik negizi ekenin atap ótti.
- Qaraǵandy óńirindegi bıznes qaýymdastyq pen azamattyq qoǵam jańa Konstıtýtsııa jobasyn qoldaıdy. Biz bul reformany áleýmettik ádilettiliktiń tiregi, memleketke degen senimdi nyǵaıtatyn jáne uzaq merzimdi ekonomıkalyq turaqtylyqtyń quraly dep kóremiz, — dedi ol.
Sondaı-aq bir palataly Quryltaıdy qalyptastyrýda saıası partııalardyń rólin kúsheıtýdiń mańyzyn atap ótti.
Re.Women áıelder qaýymdastyǵy men ReJastary jastar qozǵalysynyń ókilderi reformany azamattyq qatysýdy keńeıtetin naqty tetik retinde qoldaıtyndaryn bildirdi. Atyraý oblysyndaǵy Re.Women qaýymdastyǵynyń tóraǵasy Gúlnaz Kárimjan qoǵamdyq dıalogty keńeıtý men Halyq keńesi sekildi ınstıtýttardyń engizilýi ashyqtyq pen ádilet qaǵıdattaryna saı keletinin aıtty.
-Re.Women qaýymdastyǵy jańa Konstıtýtsııa jobasyn qoldaıdy. Bul qujat el damýyna jańa serpin beredi dep senemiz», - dedi ol.
Shyǵys Qazaqstan oblysyndaǵy ReJastary úılestirýshisi Jiger Sársenbaev Konstıtýtsııada bekitilgen «Ádiletti Qazaqstan» jáne «Zań men tártip» qaǵıdattary jastardyń áleýetin iske asyrýǵa jáne el ómirine jaýapkershilikpen aralasýyna negiz bolatynyn atap ótti.
- Ádiletke jáne quqyqqa súıengen memleket eń aldymen jas urpaqtyń taǵdyryn aıqyndaıdy», — dedi jastar qaýymdastyǵynyń ókili.
Otyrysta sondaı-aq Májilis depýtattary, Respublica partııasy fraktsııasynyń músheleri Nurgúl Taý, Oljas Quspekov, Aıtýar Qoshmambetov, Ekaterına Smolıakova, Mańǵystaý oblystyq fılıalynyń tóraǵasy Nurjigit Haırýllaev, Pavlodar oblystyq fılıalynyń tóraǵasy Amangeldi Mahanbet, Astana qalalyq fılıalynyń tóraǵasy Shyńǵys Túsipbaev sóz sóılep, usynylyp otyrǵan ózgerister aıasynda ulttyq birlikti nyǵaıtý men jergilikti ózin-ózi basqarýdyń rólin arttyrýdyń mańyzyn óńirlik turǵyda baıandady.
Talqylaý qorytyndysynda ortaq ári aıqyn sheshim qabyldandy: Respublica partııasy Qazaqstan Respýblıkasynyń jańa Konstıtýtsııasy jobasyn qoldaıdy. Qatysýshylar bul qujatty azamattardyń ál-aýqatyna baǵyttalǵan, ádiletti ári berik memleket qurýdyń negizi dep baǵalady. Partııa aldaǵy jalpyulttyq talqylaýǵa belsendi qatysýǵa daıyn ekenin bildirip, barsha azamattardy eldiń bolashaq Negizgi zańyn qalyptastyrýǵa atsalysýǵa shaqyrdy.
Osyǵan deıin Konstıtýtsııa jobasyna qatysty Májilis depýtaty Abzal Quspannyń pikirin bergen edik.