Biz Qyrǵyz – Reseı strategııalyq seriktestigi men odaqtastyq qatynastaryn joǵary baǵalaımyz – Sadyr Japarov
«Biz Qyrǵyz-Reseı strategııalyq seriktestigi men odaqtastyq qarym-qatynasyn joǵary baǵalaımyz», - dep málimdedi Qyrǵyz Respýblıkasy prezıdenti Sadyr Japarov Reseı prezıdenti Vladımır Pýtınmen keńeıtilgen kelissózinde. Kazinform bul týraly Kabar aqparat agenttigine silteme jasap habarlaıdy.
Qyrǵyz Respýblıkasy basshysy óz sózinde Pýtınniń qyrǵyz eline saparynyń úlken sımvoldyq máni bar ekenin, sebebi ol «Kant» avıabazasynyń 20 jyldyǵy men Qyrǵyz-Reseı Slavıan ýnıversıtetiniń 30 jyldyǵymen tuspa-tus kelgenin atap ótti.
«Ekijaqty qarym-qatynasymyzdaǵy bul mańyzdy oqıǵalar – dostyǵymyzdyń nyshany. Biz Qyrǵyz-Reseıdiń strategııalyq seriktestigi men odaqtastyq qarym-qatynasyn joǵary baǵalaımyz», - dedi S.Japarov.
Sóz sońynda S.Japarov Qyrǵyz Respýblıkasy Reseı úkimeti basshylyǵynyń, Syrtqy ister mınıstrligi, Tótenshe jaǵdaılar mınıstrligi, Rosgvardııa jáne basqa da delegatsııalardyń Bishkekke saparyn joǵary baǵalaıtynyn atap ótti.
«Biz Qyrǵyzstannyń Táýelsiz Memleketter Dostastyǵyna tóraǵalyq etken kezdegi eńbegin joǵary baǵalaımyz. Reseı estafetany qolǵa alyp, 2024 jyly TMD-ǵa tóraǵalyq etedi», - dedi Reseı prezıdenti Vladımır Pýtın Qyrǵyz Respýblıkasyna resmı sapary aıasynda keńeıtilgen quramdaǵy kelissózder barysynda.
Sondaı-aq RF prezıdenti Vladımır Pýtın búgin, 12 qazanda Sadyr Japarovty «Qurmet» ordenimen marapattaý týraly jarlyqqa qol qoıdy.
«Reseı men Qyrǵyz Respýblıkasy arasyndaǵy strategııalyq seriktestik pen odaqtastyq qatynastaryn nyǵaıtýǵa, Eýrazııa keńistigindegi ıntegratsııalyq úderisterdi damytýǵa qosqan eleýli úlesi úshin Qyrǵyz Respýblıkasynyń Prezıdenti Sadyr Nurǵojouly Japarov «Qurmet» ordenimen marapattalsyn», - delingen jarlyqta.
Aıta keteıik, Vladımır Pýtın Bishkekke resmı saparmen bardy. Ol sonymen qatar TMD Memleket basshylary keńesiniń otyrysyna qatysady.
