Biz qazir el ómirindegi taǵdyrsheshti reformalar kezeńine qadam bastyq — Toqaev

ASTANA. KAZINFORM — Prezıdent memlekettik qyzmette toı toılap júrýge, jalqaýlyqqa, jumysqa jaýapsyz qaraýǵa oryn joq ekenin aıtty.

Prezıdent: «Biz qazir el ómirindegi taǵdyrsheshti reformalar kezeńine qadam bastyq»

— Qazir búkil álem kúrdeli kezeńdi bastan ótkerip jatyr. Soǵan qaramastan elimiz jaqsy qarqynmen damyp keledi. Óńdeý ónerkásibi, qurylys, kólik-logıstıka salalary damýdyń qozǵaýshy kúshine aınaldy. Jyl qorytyndysy boıynsha ekonomıkamyz 6 paıyzǵa ósedi dep boljanyp otyr. Al jan basyna shaqqanda ishki jalpy ónim 15 myń dollardan asady. Júıeli túrde júrgizilip jatqan aýqymdy jumys óz nátıjesin berýde.

Prezıdent qazir el ómirindegi taǵdyrsheshti reformalar kezeńine qadam basqanymyzdy aıtty.

— Búkil memlekettik apparat, birinshi basshydan qarapaıym qyzmetkerge deıin muny tereń túsinýi kerek. Buryn-sońdy bolmaǵan mańyzdy mindetterdi júzege asyrý úshin joǵary qarqyn men bastamashylyq tanytý qajet. Batyl, sheńberge syımaıtyn, biraq aqylǵa qonymdy sheshimder qabyldaǵan jón. Memlekettik qyzmette toı toılap júrýge, jalqaýlyqqa, jumysqa jaýapsyz qaraýǵa oryn joq. Halyqqa ádemi esep emes, naqty is kerek. Sondyqtan barlyq basshy men laýazymdy tulǵadan elge paıdasy bar jumys talap etemin. Aldymyzda atqaratyn mindet kóp, — dedi Qasym-Jomart Toqaev. 

Aıta ketelik Qasym-Jomart Toqaev elordada jol-kólik oqıǵalarynyń kóbeıgenine alańdaýshylyq bildirgen edi.