Qazaqstan Prezıdentiniń Reseıge memlekettik saparyn asyǵa kútemiz — Dmıtrıı Peskov

ALMATY. KAZINFORM — Qarasha aıyna josparlanǵan Qazaqstan Respýblıkasy Prezıdentiniń Reseı Federatsııasyna birinshi memlekettik saparyna daıyndyq qyzý júrip jatyr. Bul týraly Almatyda ótken Qazaqstan-Reseı medıaforýmynda RF Prezıdentiniń baspasóz hatshysy Dmıtrıı Peskov málim etti.

— Biz qarasha aıyna Reseı Federatsııasyna josparlanǵan QR Prezıdentiniń memlekettik saparyna daıyndyq jumystaryn júrgizip jatyrmyz. Daıyndyq ártúrli baǵytta júrgizilip jatyr. Dıplomattar, parlamentter men BAQ birlese jumys atqarady, — dedi Kreml ókili.

Ol aldaǵy sharanyń mańyzdylyǵy men aýqymdylyǵyna toqtaldy.

— Jaýapkershilik óte zor jáne biz sapardy asyǵa kútemiz. Joǵary deńgeıli baılanystar barysynda pysyqtalatyn qujattardyń qomaqty paketi daıyndalyp jatyr, — dep qosty Dmıtrıı Peskov.

Aıtýynsha, qabyldaýshy memleket sapardyń joǵary deńgeıde ótýi úshin qoldan kelgenniń bárin jasaıdy.

— Biz sapardyń sátti bolatynyna senimdimiz. Qabyldaýshy el retinde biz barlyǵyn barynsha joǵary deńgeıde jasaýǵa daıyndalyp jatyrmyz, — dedi ol.

Medıaforým barysynda Dmıtrıı Peskov sondaı-aq Reseı men Qazaqstan eki táýelsiz memleket bolǵanymen, tarıhı murasy ortaq ekenin jáne birlese damý áleýetine ıe ekenin aıtty.

Aıta keteıik, 28 qyrkúıek kúni Almatyda ІІ Qazaqstan-Reseı medıaforýmy ótti.