Ǵasyrlyq tarıhy bar bilim oshaqtarynyń arnaıy katalogyn jasaýymyz kerek — mınıstr
ASTANA. KAZINFORM – Elimizde óz qyzmetin 19-20 ǵasyrlarda bastap, búgingi kúnge deıin aǵartýshylyq dástúrdiń sabaqtastyǵyn úzbeı kele jatqan 97 mektep, 12 kolledj bar. Bul týraly Oqý-aǵartý mınıstrliginiń baspasóz qyzmeti habarlady.
Oqý-aǵartý mınıstri Ǵanı Beısembaev 100 jyldan astam ýaqyt shákirt tárbıelep kele jatqan mektepterdiń pedagogıkalyq ujymdarymen onlaın formatta kezdesip, suhbattasty. Bul ǵasyrlyq tarıhy bar bilim oshaqtarynyń basyn qosqan alǵashqy jıyn boldy.
Elimizde óz qyzmetin 19-20 ǵasyrlarda bastap, búgingi kúnge deıin aǵartýshylyq dástúrdiń sabaqtastyǵyn úzbeı kele jatqan 97 mektep, 12 kolledj bar.
Máselen, Batys Qazaqstan oblysyndaǵy Jáńgir han mektebi 184 jyldan beri úzdiksiz bala oqytyp keledi. 1841 jyly Qazaqstan aýmaǵyndaǵy alǵashqy bastaýysh mektep bolyp ashylǵan bul qarashańyraqta tuńǵysh qazaq ǵalymdarynyń biri Muhammed-Salyq Babajanov, aǵartýshy Maqash Bekmuhambetov, sondaı-aq «Muǵalim» jýrnalynyń alǵashqy redaktory Ǵumar Qarash sııaqty tulǵalar bilim alǵan.
Qyzylorda oblysyndaǵy 164 jyldyq tarıhy bar № 16 mektep-lıtseı, Aqtóbe oblysyndaǵy 162 jyldyq tarıhy bar Y.Altynsarın atyndaǵy orta mektep, Atyraý oblysyndaǵy 144 jyldyq tarıhy bar Qyzylúı orta mektebi — ulttyq bilim berý dástúriniń altyn arqaýyn jalǵastyryp kele jatqan bilim ordalary. Aqmola oblysyndaǵy Joǵary orman sharýashylyǵy, ekologııa jáne týrızm kolledji 129 jyldan beri elimizdiń ekonomıkasyn nyǵaıtýǵa úles qosqan kásibı mamandar daıarlap keledi.
Kezdesý barysynda mınıstr ult rýhanııatynyń kıeli shańyraǵyna aınalǵan bilim oshaqtarynyń árqaısysynyń elimizdiń tarıhy úshin ǵana emes, bolashaǵy úshin de róli erekshe ekenin atap ótip, olardy saqtaý jáne jańǵyrtý baǵytynda birqatar tapsyrmalar berdi.
— Qazaq dalasynda aǵartýshylyqtyń qalyptasýy men damýy ondaǵan ǵasyrlardan bastaý alady. Óńirlerdiń qoldaýynyń arqasynda ǵasyrdan astam tarıhy bar mektepter jabylmaı, bilim shyraǵyn sóndirmeı, sabaqtastyqty saqtap keledi. Biz ǵasyrlyq tarıhy bar bilim oshaqtarynyń arnaıy katalogyn jasaýdy qolǵa alýymyz kerek. Bul — elimizdiń bilim tarıhynyń tereńdigin dáleldeıtin mańyzdy qujat bolmaq. Sonymen qatar, Memleket basshysynyń tapsyrmasyna sáıkes, bul mektepter de qajettiligine qaraı tolyqtaı renovatsııadan ótip, materıaldyq-tehnıkalyq turǵyda jańartylýy tıis. Sondaı-aq munda eńbek etip júrgen pedagogterdiń áleýeti de jiti zerdelenip, olarǵa júıeli qoldaý kórsetilýi qajet, — dedi Ǵanı Beısembaev.
Mınıstr júz jyldan astam ýaqyt urpaq tárbıelep kele jatqan mektepterdiń tájirıbesin zerttep, úzdikterin el kóleminde taratý qajet ekenin atap ótti. Sonymen qatar ol ǵasyrlyq mektepterdi bilim berý isiniń qundylyǵy retinde saqtap qalý jáne damytý maqsatynda 100 jyldyq mektepter qaýymdastyǵyn qurýdy, olardy qoldaý men damytýdyń strategııasyn ázirleýdi tapsyrdy.
Aıta ketelik ulttyq úzdiksiz ınklıýzıvti bilim berý ortalyǵy qurylatyny týraly jazǵan edik.