Biz Eýropa men Azııa arasyndaǵy qaýipsiz ári ornyqty kólik jolynyń negizin qalap jatyrmyz - Toqaev
ASTANA. KAZINFORM - Memleket basshysy Qasym-Jomart Toqaev «Qazaqstan – EO» dóńgelek ústelinde yntymaqtastyq áleýeti zor ekenin alǵa tartyp, Qazaqstan bul rette shynaıy strategııalyq seriktestikti jaqtaıtynyn jetkizdi, dep habarlaıdy Aqordanyń baspasóz qyzmeti.
– Eń bastysy, biz ortaq tabysqa jetkizetin senim men uzaq merzimdi mindettemeni usynamyz. Eýropalyq seriktester tabysy joǵary ınvestıtsııalyq jobalarǵa belsendi túrde atsalysady dep senemiz. Eýropalyq qarjy ınstıtýttarynyń Qazaqstannyń ornyqty ekonomıkalyq damýyna jáne óńirlerdiń ózara baılanysyn nyǵaıtatyn bastamalarǵa qoldaý kórsetkenin quptaımyz. Osy oraıda Eýropalyq ınvestıtsııalyq banktiń qosqan úlesin joǵary baǵalaımyn. Bank vıtse-prezıdenti Mora búgin aramyzda otyr. Sondaı-aq ekonomıkalyq dıalog órbitip, Qazaqstan men Eýropalyq Odaqtyń saýda kún tártibin ilgeriletý isinde jetekshi ról atqarǵany úshin komıssar Shevchovıchke alǵys aıtamyn. Eýropalyq Odaq pen Ortalyq Azııa arasyndaǵy yntymaqtastyqty damytý jolyndaǵy kúsh-jigeri úshin Arnaıy ókil Stıpraısqa rızashylyǵymdy bildiremin, – dedi Qasym-Jomart Toqaev.
Memleket basshysy sóz sońynda búgingi pikirtalastar Qazaqstan men EO-nyń strategııalyq seriktestikke qatysty ustanymy ortaq ekenin taǵy da rastaǵanyn aıtty.
– Orta dálizdi Eýropalyq Odaqtyń Global Gateway strategııasymen ushtastyrý boıynsha kelisim úderisi júrgizilýde. Biz Eýropa men Azııa arasyndaǵy qaýipsiz ári ornyqty kólik jolynyń negizin qalap jatyrmyz. Eýropanyń ınvestıtsııasyna jáne ozyq tehnologııasyna aıyrbas retinde mańyzdy qazba baılyqtary men qýat resýrstaryn paıdalanýǵa múmkindik beretin pragmatıkalyq formýlany usyný arqyly senimdi seriktes bolýǵa ázirmiz. Joǵary tehnologııalyq agrobıznesten bastap jasandy ıntellekt salasyndaǵy jańashyl ónertabystarǵa, AHQO aıasyndaǵy qarjylandyrý tetikterine deıingi kóptegen salada uzaqmerzimdi ıntegratsııaǵa ashyqpyz. Úkimetimiz mańyzdy bastamalardy tez ári tabysty iske asyrý úshin kommertsııalyq usynystaryńyzdy zerdeleıtin bolady, – dedi Prezıdent.
Jıynda Eýropalyq Odaqtyń Ortalyq Azııa boıynsha arnaıy ókili Edýards Stıpraıs, Saýda jáne ekonomıkalyq qaýipsizdik jónindegi eýrokomıssar Marosh Shefchovıch, Eýropalyq ınvestıtsııalyq banktiń vıtse-prezıdenti Marek Mora, Sarens Group prezıdenti Lýdo Sarens, Roca Group bas dırektory Alberto Magrans, Dewulf Group bas dırektory Hendrık Dekramer, Polpharma Group baıqaýshylar keńesiniń tóraǵasy Ejı Starak, Airbus SE kompanııasynyń Eýropa óńiri boıynsha prezıdenti Joan Pelıse, Damen Shipyards Group teń quryltaıshysy, dırektorlar keńesiniń múshesi Roýz Damen, LOT Polish Airlines áýe kompanııasynyń bas dırektory Mıhal Fııol, Bureau Veritas kompanııasynyń Eýropa óńiri boıynsha aǵa vıtse-prezıdenti Vensan Býrdıl, Maersk Group basqarýshy dırektory Aıhan Sıdef, Cargolux kompanııasynyń kommertsııalyq josparlaý jónindegi aǵa vıtse-prezıdenti Perandrea Gallı, MAIRE Tecnimont bas dırektory Alessandro Bernını sóz sóıledi.
Osyǵan deıin Qasym-Jomart Toqaev eýropalyq seriktesterdi aýyl sharýashylyǵy salasy boıynsha yntymaqtasýǵa shaqyrdy.
