Biz esirtki aınalymyn túp-tamyrymen joıýǵa tyrysamyz — Aýǵanstan Іshki ister mınıstriniń orynbasary
SAMARQAND. KAZINFORM — Resmı Kabýl eldegi esirtkige qarsy kúresti kúsheıte túsýge nıetti, dep habarlaıdy Kazinform agenttiginiń menshikti tilshisi.
Bul týraly Samarqandta ótip jatqan Esirtkige qarsy kúres jónindegi Ortalyq Azııa óńirlik ortalyǵynyń otyrysynda Aýǵanstan Іshki ister mınıstriniń orynbasary Abdýrahman Mýnır málim etti.
— Aýǵanstan úkimetinde kontrabandanyń aldyn alýǵa baǵyttalǵan jospar bar, sáıkesinshe biz onyń aınalymyn túp-tamyrymen joıýǵa tyrysamyz. Qazirdiń ózinde nátıjege qol jetkizdik. Esirtkiniń asa iri kólemi jaıly málimdep jatqan memleketter Aýǵanstandaǵy jaǵdaıdan tolyq habardar emes. Eger olar naqty derektermen tanyssa, onda eldegi kúres sharalarynyń qalaı júzege asyp jatqanyna kóz jetkizedi. Biz batyl sheshimder qabyldaı otyryp, aldaǵy ýaqytta jumysty jalǵastyrýǵa múddelimiz, — dedi Abdýrahman Mýnır.
Aýǵanstan ókili atap ótkendeı, el bıligi Esirtkige qarsy kúres jónindegi Ortalyq Azııa óńirlik aqparattyq úılestirý ortalyǵymen yntymaqtasýǵa nıetti.
— Biz úshin atalǵan ortalyqpen yntymaqtasý mańyzdy. Tıisinshe, oǵan barlyq kúsh-jigerimizdi baǵyttaımyz. Bul eldegi esirtki óndirisi men onyń aınalymyn túbegeıli joıýǵa yqpal etedi, — dep túıindedi mınıstrdiń orynbasary.
Aıta keteıik, atalǵan ortalyqqa qazirgi ýaqytta 7 memleket — Qazaqstan, Ózbekstan, Ázerbaıjan, Reseı, Túrikmenstan, Tájikstan jáne Qyrǵyzstan múshe.
Eske salsaq, osy is-shara barysynda baıandama jasaǵan Ózbekstan Qaýipsizdik keńesi hatshysynyń orynbasary Bahodır Tashmatov Ortalyq Azııa arqyly jylyna 90 tonnaǵa jýyq geroın ótetinin málimdedi.
Buǵan deıin habarlaǵanymyzdaı, Esirtkige qarsy kúres jónindegi Ortalyq Azııa óńirlik aqparattyq úılestirý ortalyǵynyń keńsesi Almatydan Astanaǵa kóshirilýi múmkin.
Sondaı-aq, Esirtkige qarsy kúres jónindegi Ortalyq Azııa óńirlik ortalyǵy QR Ulttyq qaýipsizdik komıtetimen birlesip, Qytaı, Azııa jáne Eýropa elderine baǵyttalǵan esirtki trafıginiń jolyn kesý boıynsha tıisti sharalar legin ázirlep jatyr.