Biz deeskalatsııa jolyn izdeýimiz kerek: Jozep Borrel HAMAS kóshbasshysynyń qazasy týraly
ASTANA. KAZINFORM — Eýroodaqtyń Syrtqy ister jáne qaýipsizdik saıasaty jónindegi joǵary ókili Jozep Borrell HAMAS jetekshisiniń Iranda qaıtys bolýy týraly habardan keıin shıelenisti azaıtýdyń joldaryn izdeý qajet ekenin aıtyp, Gazadaǵy qaqtyǵystardy tez arada toqtatýǵa shaqyrdy, dep jazady Euronews.
HAMAS kóshbasshysy Ismaıl Hanııanyń Tegeranda qaıtys bolýy jáne odan keıingi Iran bıliginiń málimdemeleri Taıaý Shyǵystaǵy soǵystyń keńeıýine qatysty alańdaýshylyq týǵyzdy.
Eýroodaqtyń syrtqy ister jáne qaýipsizdik saıasaty jónindegi Joǵarǵy ókili Jozep Borrel Vetnamǵa sapary barysynda qaqtyǵysty deeskalatsııalaý joldaryn izdeý qajet ekenin atap ótti.
- Men qandaı da bir túsinik bermes buryn qosymsha aqparat kútýim kerek. Biraq buǵan deıin shekarada shıelenis bolyp, Gazadaǵy soǵys jalǵasyp jatyr. Men Laosta bolǵanymda Lıvannyń Syrtqy ister mınıstri Bý Habıbpen sóılestim. Men tek shıelenisti báseńdetý joldaryn izdestirý jáne búkil aımaqqa, tipti odan tys jerlerge de áser etetin soǵysty boldyrmaý kerek ekenin aıta alamyn. Dál qazir Gazadaǵy atysty toqtatý kerek, - dedi Borrel.
Qytaı HAMAS saıası bıýrosynyń basshysy Ismaıl Hanııanyń qazasyna qatty alańdaýshylyq bildirip, onyń óltirilýine úzildi-kesildi qarsylyq bildirip, aıyptaıdy, dep habarlady sársenbi kúni Qytaı Syrtqy ister mınıstrliginiń baspasóz hatshysy Lın Tszıan.
- Biz bul oqıǵaǵa beıjaı qaramaımyz, kisi óltirýge úzildi-kesildi qarsymyz. Sonymen qatar, bul oqıǵa aımaqtaǵy turaqsyzdyqty odan ári ýshyqtyrý múmkindigine alańdaımyz. Qytaı árqashan aımaqtyq daýlardy kelissózder men dıalog arqyly sheshýdi jaqtaıdy. Qaqtyǵystar men teketirestiń odan ári órshýine jol bermeý úshin Gazada múmkindiginshe tezirek jan-jaqty jáne turaqty atysty toqtatýǵa qol jetkizý qajet, - dedi qytaılyq dıplomat.
AQSh Qorǵanys mınıstri Lloıd Ostın de Taıaý Shyǵystaǵy jaǵdaıdyń shıelenisý qaýpine alańdaýshylyq bildirdi, biraq ol Hanııanyń qazasy aımaqta úlken soǵysqa ulasady dep eseptemeıdi.
Kreml HAMAS jetekshisiniń óltirilýin aıyptap, mundaı áreket aımaqta beıbitshilik ornatý áreketterine qarsy baǵyttalǵan jáne «onsyz da shıelenisken jaǵdaıdy aıtarlyqtaı turaqsyzdandyrýy múmkin» ekenin málimdedi.
Buǵan deıin HAMAS jetekshisiniń qazasy álemde qandaı reaktsııa týdyrǵany týraly habarlanǵan bolatyn.
