«Biz de jábirlenýshimiz»: Bek Air sotynda ushqyshtardyń áıelderi taǵylǵan aıypqa narazylyq bildirdi
ALMATY. KAZINFORM – Almatyda 2019 jyly bolǵan Bek Air ushaǵynyń apatyna qatysty sot jaryssózi jalǵasyp jatyr.
Túrksib aýdandyq sotyndaǵy aıyptalýshylar oryndyǵy bos tur. Sebebi is boıynsha aıyptalýshylar retinde kórsetilgen ushqyshtar – Meıirjan Moldaqulov pen Marat Muratbaev apat kezinde qaza tapqan. Buǵan deıin sotta prokýror Aıdos Palmanov ushaq apatyna áýe kemesin basqarǵan ushqyshtar kináli ekenin aıtty.
Alaıda sot jaryssózinde ómirden ótken ushqyshtardyń jubaılary marqum kúıeýlerin aıyptaýdy toqtatýdy ótindi. Meıirjan Moldaqulovtyń jary Zaýresh Moldaqulova olardyń otbasy da aýyr qaıǵyǵa ushyraǵanyn aıtty.
— Biz de jábirlenýshimiz. Biz de sol jaǵdaıdyń qurbandarymyz. Kúıeýim qaza tapqanda qyzym nebári 2 jasta edi. Ol áli kúnge deıin ákesin izdeıdi, balam da psıhologııalyq jaraqat aldy. Jalǵyz qalǵysy kelmeıdi, qorqady, men de ómirinen ketem be dep oılaıdy. Eger olar ushyp úlgergende, áýede jarylyp, bári qaza tabar ma edi. Sol úı bolmaǵanda, bári tiri qalar edi, — dedi ol.
Onyń aıtýynsha, apattan keıin aýrýhanada jatqan kúıeýi aýyr halde bolsa da, tergeýshi ony suraqtyń astyna alǵan.
— Kúıeýime operatsııa jasaldy, biraq 30 jeltoqsanda-aq tergeýshi ony aýyr jaǵdaıyna qaramastan tergeı bastady. Bul azaptaýmen teń boldy. Osydan keıin onyń jaǵdaıy nasharlady, dárigerler de muny rastady, — dedi ol.
Zaýresh Moldaqulova tergeý tarapynan olardyń otbasyna qysym kórsetilip, ushqyshtardyń kinásin moıyndatýǵa tyrysqanyn atap ótti.
— Tergeýshi operatsııadan keıin kúıeýimniń ońalýyna múmkindik bermedi. Bizdi aýrýhanaǵa kirgizbedi. Tek dárigerler onyń jaýap alýǵa jaramsyz ekenin aıtqanda ǵana tergeýdi toqtatty. Biz ádildiktiń ornaǵanyn qalaımyz. Bizdiń artymyzda halyqaralyq uıym — Adam quqyqtary jónindegi bıýro tur. Biz kúıeýlerimizdiń aqtalýyn, rýhtarynyń tynyshtyq tapqanyn qalaımyz. 6 jyl boıy olardyń rýhyn mazalap kelemiz, — dedi ushqyshtyń jubaıy.
Ekinshi ushqysh Marat Muratbaevtyń jubaıy da sotta sóz sóılep, kózine jas aldy. Ol kúıeýiniń barlyq medıtsınalyq tekserýden jáne ushý aldyndaǵy komıssııadan sátti ótkenin, tájirıbeli ári jaýapty ushqysh bolǵanyn, ekıpaj ben jolaýshylardyń ómiri úshin sońyna deıin kúreskenin aıtty.
— Ushaqtyń sol nemese oń qanatynda, naqty esimde joq, 6,5 tonna kerosın bolǵan. Olar sol qanatty joǵary kóterip úlgerdi. Eger qanat úıge soǵylǵanda bári órtenip keter edi. Biz de jaqyndarymyzdy joǵalttyq. Áli kúnge deıin óz-ózimizge kele almaımyz. Jolaýshylar ushqyshtardy kinálaıdy… Sol úı bolmaǵanda, olar ushaqty qondyrar edi. Bizge de aýyr, biz de adambyz. Nege tek ushqyshtar aıyptalady? Bizge de aýyr — biz de jábirlenýshimiz, — dedi ol.
Búgin sot otyrysynda jábirlenýshi taraptyń advokat Almaty áýejaıy men Azamattyq avıatsııa komıteti qyzmetkerlerine aıyp taqty.
Oǵan deıin sotta Bek Air ushaq apatynyń sebebin dálirek anyqtaý úshin jasandy ıntellekt saraptamasyn paıdalaný usynyldy. Sondaı-aq sot Bek Air áýe kompanııasynyń múlkine shekteý qoıdy.
Eske salaıyq, 2019 jyldyń 27 jeltoqsanynda Almatydan Astana qalasyna ushyp shyqqan Bek Air kompanııasynyń ushaǵy radardan joǵalyp ketti. Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.
Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan. Saldarynan 12 adam qaza tapty. Osydan keıin Bek Air áýe kompanııasyna tıesili toǵyz Fokker-100 ushaǵynyń qyzmeti toqtatyldy.