Biz BUU-men tyǵyz jumys isteımiz — Tramp
ASTANA. KAZINFORM — Vashıngtonda Beıbitshilik keńesiniń alǵashqy otyrysy ótip, onda AQSh prezıdenti Donald Tramp birqatar mańyzdy málimdemeler jasady, dep habarlaıdy Kazinform agenttiginiń AQSh-taǵy menshikti tilshisi.
Tramp AQSh-tyń Beıbitshilik keńesine 10 mıllıard dollar bóletinin aıtty. Eger bul somany soǵys shyǵynymen salystyrsa óte az — tek eki aptalyq shaıqasqa jetedi.
— Maǵan Beıbitshilik salasyndaǵy Nobel syılyǵynyń qajeti joq, men adamdardyń ómirin saqtap qalýdy oılaımyn. Men AQSh-tan shalǵaı jatqan, álemniń kelesi túkpirindegi adamdardyń mert bolǵanyn qalamaımyn. Eger mende soǵystardy toqtatý múmkindigi bolsa, sony paıdalanǵym keledi. Men adamdardyń ómirin saqtap qalýdy qalaımyn jáne júldege muqtaj emespin, — dedi Donald Tramp.
Álem HAMAS ne aıtatynyn kútip otyr jáne dál qazir beıbitshilikke kedergi bolyp turǵan jalǵyz áreket — osy.
— Olardan ekstremızmdi ýaǵyzdaıtyndardyń ózi sharshady. Bul kóp jyldan beri jalǵasyp kele jatyr. Olar beıbitshilikti qalaıdy, endi Irannyń bizge qosylatyn ýaqyty keldi. Eger qosylsa, óte keremet bolar edi. Al qosylmasa, bul da jaqsylyq, biraq múldem basqa jol. Olar búkil aımaqtaǵy turaqtylyqqa qaýip tóndire almaıdy. Kelisimge kelýi kerek, — dedi AQSh prezıdenti.
Amerıkalyq kóshbasshy BUU-men tyǵyz jumys jasaıtynyn da málimdedi.
— BUU-nyń áleýeti zor dep oılaımyn. Beıbitshilik keńesi Birikken Ulttar Uıymyn qadaǵalap, onyń durys jumys isteıtinine kóz jetkizedi. Oǵan kómek kerek, biz oǵan kómektesemiz, — dedi Tramp.
AQSh prezıdenti Beıbitshilik keńesiniń róli belsendi bolatynyn atap ótti.
— Búgingi kúni Beıbitshilik keńesi elderdi biriktirip ǵana qoımaı, óz mindettemesin jarııalap, naqty sheshimderdi ázirlep, júzege asyratynyn dáleldep otyr. Bul kelissózder emes, kerisinshe úzdiksiz is-áreketter. Biz egemendi memleketterdiń óz aımaqtaryndaǵy máselelerdi birlesip sheshý úshin qalaı yntymaqtasa alatynynyń úlgisin kórsetip otyrmyz, — deıdi Donald Tramp.
AQSh-tyń memlekettik hatshysy Marko Rýbıo Gazada qalyptasqan jaǵdaıdy qoldanystaǵy qurylymdar men jalpy qabyldanǵan tásilder aıasynda sheshý múmkin emes dep málimdedi.
— Biz BUU-ǵa júgindik, osy topty qurýǵa jáne máseleniń naqty sheshimin tabý úshin elderdi biriktirýge ruqsat aldyq. Bul árbir memlekettiń úlesin qajet etedi jáne qatysqandaryńyz úshin alǵys aıtamyz, — dedi Rýbıo.
Memlekettik hatshy alǵa jyljýdyń jalǵyz joly - Gazany ózge eldermen qatarlasa ómir súre alatyn jáne qaqtyǵysqa, soǵysqa, adamnyń qaıǵy-qasireti men joıylýyna qaıta oralý týraly eshqashan alańdamaıtyn turaqty beıbitshilik ornaıtyndaı etip qalpyna keltirý ekenin atap ótti.
Aq úı baspasóz hatshysynyń aıtýynsha, Vashıngtondaǵy kezdesýge 20-dan astam eldiń ókilderi qatysty. AQSh astanasynda qaýipsizdik sharalary kúsheıtilip, quqyq qorǵaý organdary Donald Tramptyń Beıbitshilik ınstıtýtyn qorshaýǵa aldy.
Beıbitshilik keńesiniń otyrysy kezinde ǵımarat aldynda Palestınany jaqtaýshy belsendilerdiń Gaza sektoryn qoldaý mıtıngisi ótti.
Aıta keteıik, Prezıdent Qasym-Jomart Toqaevtyń bastamasy amerıkandyq saıası taldaýshynyń nazaryn aýdardy.