Biz birgemiz: 10 respýblıkalyq arnanyń tikeleı efırinde jalpyulttyq telemarafon ótedi
ASTANA. KAZINFORM – 30 sáýir kúni saǵat 17:00 – 22:00 aralyǵynda 10 respýblıkalyq arnanyń tikeleı efırinde «Biz birgemiz» jalpyulttyq telemarafony ótedi. Mundaı marafon elimizde alǵash ret uıymdastyrylyp otyr.
Telemarafonnyń basty keıipkerleri — tabıǵı apat kezeńinde batyldyq tanytyp, óz ómiri men densaýlyǵyn qaýip-qaterge tige otyryp qyzmeti men azamattyq boryshyn abyroımen atqarǵan qazaqstandyqtar. Olardyń qatarynda qutqarýshylar, medıtsına qyzmetkerleri, áskerı qyzmetshiler, eriktiler, kásipkerler men syn saǵatta judyryqtaı jumylyp, yntymaq pen birliktiń úlgisin tanytqan el turǵyndary bar.
«Jibek Joly», «Qazaqstan», «Habar», «Eýrazııa», «KTK», «31 arna», «Atameken Business», «Astana TV», «7 arna» jáne «Almaty TV» telearnalarynyń 5 saǵattyq tikeleı efırinde tasqyn basqan aýmaqty kózben kórgen, tabıǵı apattan zardap shekken turǵyndardyń jan tebirenter oqıǵalary aıtylyp, tabıǵı apat aımaqtarynan reportajdar beriledi.
Sharanyń onlaın translıatsııasy Jibek Joly efırinde, sondaı-aq YouTube jelisinde júrgiziledi.
Aıta ketsek, sý tasqynyna baılanysty elimizdiń on aımaǵynda: Abaı, Aqmola, Aqtóbe, Atyraý, Batys Qazaqstan, Qaraǵandy, Qostanaı, Pavlodar, Soltústik Qazaqstan jáne Ulytaý oblystarynda tótenshe jaǵdaı jarııalanǵan bolatyn. Tabıǵı apatqa qarsy kúres jáne saldaryn joıý sharalary qarqyndy júrip jatyr.
Memleket basshysy Qasym-Jomart Toqaev elimizdiń birqatar oblysyndaǵy sý tasqyny saldarynan qalyptasqan kúrdeli jaǵdaıǵa baılanysty Qazaqstan halqyna úndeý jarııalaǵan bolatyn. Prezıdent bul kólemi jaǵynan sońǵy 80 jyldan bergi eń iri tabıǵı apat ekenin aıtqan edi.
Sondaı-aq Memleket basshysy Qostanaı oblysyna jumys sapary barysynda sý tasqynynan zardap shekken halyqqa naqty kómek kórsetý isinde bıznesmenderdiń róli zor ekenine aıryqsha nazar aýdardy. «Bizdiń elimizde Forbes tizimine kiretin iri kásipkerler bar. Olarmen arnaıy kezdesemiz. Olar ár oblysqa, aýdanǵa, eldi mekenge bekitiledi jáne naqty jaýapkershilik júkteledi. Bul bir jaǵynan kásipkerlerdiń múddesine saı keledi. Óıtkeni olar ózderiniń qosqan úlesiniń naqty nátıjesin kóretin bolady. Halqyna qaıyrymdylyq jasaǵan azamat retinde Sizderdiń de esimderińiz memleket tarapynan eleýsiz qalmaıdy dep oılaımyn», — dedi Qasym-Jomart Toqaev.
Prezıdent bastamasyn qoldaǵan otandyq bıznes ókilderi sý tasqynynan zardap shekken jandarǵa belsendi qoldaý kóresetip jatyr. Іri kásipkerler men kompanııalar qaıyrymdylyq qorlary arqyly tehnıka, gýmanıtarlyq jáne qarjylaı kómek kórsetip keledi. Buǵan deıin habarlaǵanymyzdaı, qaıyrymdylyq qoryna túsken jalpy soma 190 mlrd teńgeden asty.
