Biz bilimge negizdelgen ekonomıka qurǵymyz keledi - Prezıdent
ASTANA. KAZINFORM - «Qazaqstan – EO» dóńgelek ústelinde eýropalyq bıznes ókilderine «Astana» halyqaralyq qarjy ortalyǵynyń múmkindikteri tanystyryldy, dep habarlaıdy Aqordanyń bapasóz qyzmeti.
Prezıdent atap ótkendeı, Global Financial Centers Index reıtınginde AHQO Shyǵys Eýropa jáne Ortalyq Azııa óńiri boıynsha birinshi oryn alady. Ortalyqta álemniń 90-nan astam elinen 5800-den asa kompanııa tirkelgen, onyń ishinde 250-ge jýyǵy – Eýropa elderinen. AHQO arqyly eýropalyq kompanııalar úlestik qarjylandyrý retinde 307 mıllıon dollar kóleminde tikeleı ınvestıtsııa saldy.
Memleket basshysy Eýropanyń qarjy jáne ınnovatsııa ınstıtýttaryn Astana halyqaralyq qarjy ortalyǵymen birge ornyqty qarjylandyrý jáne fınteh-tehnologııalardy ilgeriletý salasyndaǵy yntymaqtastyqty jalǵastyrýǵa shaqyrdy.
Prezıdent adam kapıtalyn damytý taqyrybyna toqtalyp, Eýropalyq Odaq áldeqashan elimizdiń ǵylym jáne bilim salasyndaǵy jetekshi seriktesine aınalǵanyn atap ótti.
– Elimizdiń túkpir-túkpirinde qazirdiń ózinde 40 shaqty halyqaralyq akademııalyq jáne zertteý ortalyqtary jumys istep jatyr. Olardyń qatarynda Anhalt qoldanbaly ǵylym ýnıversıtetiniń, Lotarıngııa ýnıversıtetiniń jáne Marke polıtehnıkalyq ýnıversıtetiniń ókildikteri bar. Qazaqstan Erasmus+, Horizon Europe jáne basqa da baǵdarlamalar aıasynda Eýropalyq Odaqpen yqpaldastyqty jolǵa qoıdy. Biz bilimge negizdelgen ekonomıka qurǵymyz keledi. Sondyqtan Horizon Europe kelesi negizdemelik baǵdarlamasynyń qaýymdastyrylǵan músheligine ótý úshin ótinish berdik. Qazaqstan ekonomıkamen shektelmeı, Ortalyq Azııa elderine jáne basqa da memleketterge biliktiligi joǵary mamandar daıarlaıtyn óńirlik bilim berý ortalyǵy retindegi rólin nyǵaıta túsedi, – dedi Prezıdent.
Osyǵan deıin Qasym-Jomart Toqaev eýropalyq seriktesterdi aýyl sharýashylyǵy salasy boıynsha yntymaqtasýǵa shaqyrdy.
