Biz baqylaýǵa, tyńdaýǵa jáne kórgenimizdi baıandaýǵa keldik — halyqaralyq sarapshy
ASTANA. KAZINFORM — Memlekettik ınstıtýttar men saılaý protsesine degen senim el damýynyń negizgi faktorlarynyń biri. Bul týraly The Geneva Times bas redaktory, Le Conseil Universel des Droits de l’Homme úkimettik emes uıymynyń jetekshisi Mýız Vahabadın aıtty.
Ol Qazaqstandaǵy saılaý barysyn baqylaý kezinde alǵan áserin bólisti.
— Senim damý protsesiniń eń mańyzdy quramdas bólikteriniń biri. Sondyqtan saılaý protsesi jáne azamattardyń oǵan qatysý múmkindigi úlken mańyzǵa ıe, — dedi Mýız Vahabadın.
Onyń aıtýynsha, halyqaralyq baıqaýshylar birneshe saılaý ýchaskesine ǵana baryp, eldegi jaǵdaıdyń tolyq kórinisin baǵalaı almaıdy. Degenmen mundaı saparlar daýys berý barysy týraly belgili bir túsinik qalyptastyrýǵa múmkindik beredi.
— Eki saılaý ýchaskesi búkil eldiń jaǵdaıyn kórsete almaıdy. Alaıda baqylaý aıasynda biz saılaý protsesi týraly keńirek túsinik ala alamyz. Qazirgi tańda bizdiń tájirıbemiz negizinen oń boldy, — dedi ol.
Mýız Vahabadın halyqaralyq baıqaýshylardyń negizgi mindeti saılaý protsesin tikeleı baqylaý, azamattarmen qarym-qatynas ornatý jáne bolyp jatqan jaǵdaılardy tirkeý ekenin atap ótti.
— Biz baqylaýǵa, tyńdaýǵa jáne kórgenimizdi baıandaýǵa keldik, — dedi ol.
Halyqaralyq sarapshy Qazaqstannyń óńirdegi mańyzyna da toqtaldy
— Qazaqstan túrli mádenıetterdi, dástúrler men dinderdi baılanystyryp turǵan óńirdegi mańyzdy memleket. Osy turǵydan alǵanda, saılaý — saıası jáne qoǵamdyq damýdyń mańyzdy bóligi, — dep túıindedi halyqaralyq baıqaýshy.
Aıta keteıik, buǵan deıin halyqaralyq baıqaýshy Basel Ál-Hadj Djasem Qazaqstanda bir palataly Quryltaı depýtattaryn saılaý barysynda saılaý protsesiniń ashyqtyǵy týraly aıtqan edi.
