Bıýrokratızm bul memlekettik basqarý júıesindegi jumystyń normadan tys bolý problemalarynyń biri - Elbasy
ASTANA. 17 qazan. QazAqparat - Búgin «A» basqarýshy korpýsy memlekettik qyzmetshilerimen keńes ótkizgen Elbasy Nursultan Nazarbaev memlekettik qyzmet salasyndaǵy problemalardy atady.
«Bizde, memlekettik qyzmette birqatar problemalar bar. Eń aldymen bul memlekettik qyzmetterdegi sapanyń tómendigi. Bir kúnde 450 buzýshylyq oryn alady. Qujat aınalymy deńgeıin bıýrokratııa deýge de bolady, 1 qyzmetkerge keletin qujattar sany 500-ge jetip jyǵylady»,- dedi Elbasy.
Máselen, ótken jyly qazaqstandyqtar memlekettik organdardyń talaptary boıynsha 22 mln. anyqtama tapsyrǵandyǵyn basa aıtqan Memleket basshysy: «Qazaqstannyń barlyq halqynan da kóp. Bul qalaı bolǵany? Bul tipti, biz elektrondy qujat aınalymy júıesi men HQKO-lardy belsendi damytyp otyrǵannyń ózinde-aq oryn alýda. Men ózimniń apparatyma saýal qoıamyn: HQKO-lardyń, elektrondy úkimettiń jumysy qaıda? Bıýrokratızm bul memlekettik basqarý júıesindegi jumystyń normadan tys bolý problemalarynyń biri»,- dedi.
Bul rette QR Prezıdenti óz tapsyrmasymen «Memlekettik qyzmetter týraly» zańnyń qabyldanǵanyn atap ótip, bul zań árbir memlekettik qyzmetshiniń ústel kitabyna aınalýy tıistigin basa aıtty.
