Bıýroda Senat otyrysynyń kún tártibi bekitildi
ASTANA. 13 qańtar. QazAqparat - Búgin Qasym-Jomart Toqaevtyń tóraǵalyq etýimen Qazaqstan Respýblıkasy Parlamenti Senaty Bıýrosynyń otyrysy boldy. Senat Tóraǵasy Prezıdent N.Á.Nazarbaevtyń uzaq merzimdi Strategııasyn dáıekti túrde iske asyrý maqsatynda Parlament joǵarǵy palatasy depýtattarynyń kelisilgen jáne jigerli jumystarynyń mańyzyn atap ótti.
Bıýroda Senat komıtetterine Májiliste maquldanǵan zań jobalary bólindi. Qarjy jáne bıýdjet komıtetine Bernde 1999 jylǵy 21 qazanda qol qoıylǵan Qazaqstan Úkimeti men Shveıtsarııa Federaldyq Keńesi arasyndaǵy Tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý týraly konventsııaǵa jáne Hattamaǵa ózgerister men tolyqtyrýlar engizý týraly Qazaqstan Úkimeti men Shveıtsarııa Federaldyq Keńesi arasyndaǵy Hattamany ratıfıkatsııalaý zań jobasy berildi. Osy komıtet Qazaqstan men Eýropa Qaıta Qurý jáne Damý Banki arasyndaǵy yntymaqtastyq pen qyzmetine qatysty kelisimdi ratıfıkatsııalaý týraly zań jobasyn da aldy. Konstıtýtsııalyq zańnama, sot júıesi jáne quqyq qorǵaý organdary komıteti zańnamaǵa turmystyq zorlyq-zombylyqqa qarsy máseleler boıynsha ózgerister men tolyqtyrýlar engizý týraly zań jobasy boıynsha bas komıtet bolyp belgilendi.
Bıýro músheleri Senattyń 16 qańtarda bolatyn jańa jyldaǵy alǵashqy otyrysynyń kún tártibin de qarady. Atap aıtqanda, senatorlar TMD-ǵa qatysýshy memleketter kúshteriniń áýe shabýylyna qarsy qorǵanys jónindegi kezekshileriniń áýe kemesin basyp alý (ushyryp áketý) týraly aqparatty alǵan kezdegi is-qımyldaryn uıymdastyrý týraly kelisimdi ratıfıkatsııalaý jáne Ujymdyq qaýipsizdik týraly shart uıymyna múshe memleketterdiń aýmaqtaryna áskerı ınfraqurylym obektilerin ornalastyrý týraly hattamany ratıfıkatsııalaý týraly zań jobalaryn qaraýdy josparlady. Odan basqa, Senat zańnamaǵa Qazaqstan Respýblıkasynyń halyqaralyq sharttary máseleleri boıynsha túzetýlerdi qaraıtyn bolady.
