Bıýro Senat otyrysynyń kún tártibin kelisti
ASTANA. QazAqparat - Qasym-Jomart Toqaevtyń tóraǵalyq etýimen Senat Bıýrosynyń otyrysy boldy. Bıýro músheleri Palatanyń kezekti otyrysynyń kún tártibin kelisti. Aldaǵy beısenbi kúni senatorlar on eki zań jobasyn qaraýdy josparlady.
Depýtattar qaraýyna Qazaqstan men Qytaı Úkimetteri arasyndaǵy Qazaqstan-Qytaı memlekettik shekarasynyń rejımi týraly kelisimdi jáne Shanhaı yntymaqtastyq uıymyna múshe memleketterdiń úkimetteri arasyndaǵy halyqaralyq avtomobıl tasymaldary úshin qolaıly jaǵdaılar jasaý týraly kelisimdi ratıfıkatsııalaý týraly zań jobalary engiziledi.
Palata otyrysynda «Memlekettik aýdıt jáne qarjylyq baqylaý týraly» zań jobasy jáne zańnamaǵa memlekettik aýdıt jáne qarjylyq baqylaý máseleleri boıynsha ilespe túzetýler (birinshi oqylym) qaralady.
Senat depýtattary sondaı-aq «Memlekettik-jekeshelik áriptestik týraly» zań jobasyn, jáne zańnamaǵa memlekettik-jekeshelik áriptestik máseleleri boıynsha ilespe túzetýlerdi (birinshi oqylym) talqylaıdy.
Senatorlar sondaı-aq «Ózin-ózi retteý týraly», «Qoǵamdyq keńester týraly» zań jobalaryn jáne ilespe zańdardyń jobalaryn qaraıdy.
Sonymen qatar zańnamaǵa jergilikti ózin-ózi basqarýdy damytý, elektr energetıkasy, jergilikti polıtsııa qyzmetiniń jumysy máseleleri boıynsha túzetýler engizý týraly zań jobaslary qaralady.
Odan basqa, Bıýroda taıaýda Májilisten túsken on segiz zań jobasy Senattyń turaqty komıtetterine bólindi.
Konstıtýtsııalyq zańnama, sot júıesi jáne quqyq qorǵaý organdary komıtetine «Qazaqstan Respýblıkasynyń memlekettik qyzmeti týraly» zań jobasy jáne zańnamaǵa osy zań jobasy boıynsha ilespe túzetýler berildi.
«Qazaqstan Respýblıkasynyń keıbir zańnamalyq aktilerine salyqtyq jáne kedendik ákimshilik júrgizý máseleleri boıynsha ózgerister men tolyqtyrýlar engizý týraly» jáne «Qazaqstan Respýblıkasynyń keıbir zańnamalyq aktilerine ekinshi deńgeıdegi bankterdiń jumys istemeıtin kredıtteri men aktıvteri, qarjylyq qyzmetter kórsetý jáne qarjy uıymdary men Qazaqstan Respýblıkasy Ulttyq Bankiniń qyzmeti máseleleri boıynsha ózgerister men tolyqtyrýlar engizý týraly» zań jobalarymen Qarjy jáne bıýdjet komıteti shuǵyldanatyn boldy.
Halyqaralyq qatynastar, qorǵanys jáne qaýipsizdik komıteti «Sybaılas jemqorlyqqa qarsy is-qımyl týraly» zań jobasy jáne oǵan ilespe túzetýler boıynsha bas komıtet bolyp belgilendi.
Ekonomıkalyq saıasat, ınnovatsııalyq damý jáne kásipkerlik komıteti «Qazaqstan Respýblıkasynyń Úkimeti men Serbııa Respýblıkasynyń Úkimeti arasyndaǵy Investıtsııalardy ózara kótermeleý jáne qorǵaý týraly kelisimdi ratıfıkatsııalaý týraly» zań jobasy, «Aqparattandyrý týraly» zań jobasy jáne oǵan ilespe túzetýler, «Qazaqstan Respýblıkasynyń keıbir zańnamalyq aktilerine memlekettik qyzmetter kórsetý máseleleri boıynsha ózgerister men tolyqtyrýlar engizý týraly» zań jobalary tapsyryldy. Osy komıtetke ındýstrııalyq-ınnovatsııalyq saıasat máseleleri boıynsha túzetýler jobasy da berildi.
Áleýmettik-mádenı damý jáne ǵylym komıteti «Qaıyrymdylyq týraly» zań jobasy, Eńbek kodeksiniń jobasy jáne zańnamaǵa ilespe túzetýler, sondaı-aq «Qazaqstan Respýblıkasynyń keıbir zańnamalyq aktilerine bilim berý máseleleri boıynsha ózgerister men tolyqtyrýlar engizý týraly» zań jobasy boıynsha bas komıtet bolyp belgilendi.
Agrarlyq máseleler, tabıǵatty paıdalaný jáne aýyldyq aýmaqtardy damytý komıtetine «Organıkalyq ónim óndirý týraly» zań jobasy jáne zańnamaǵa organıkalyq ónim óndirý jáne agroónerkásiptik keshendi damytý máseleleri boıynsha túzetýler berildi.
Bas komıtetter Senattyń barlyq turaqty komıtetteriniń usynystaryn pysyqtap, osy zań jobalary boıynsha Palatanyń otyrysyna qorytyndy ázirleıtin boldy.
