Bıýlletendi búldirip alǵan jaǵdaıda jańasy berile me

ASTANA. KAZINFORM — Azamattarǵa daýys berýge bir ǵana bıýlleten usynylady. Bul jóninde QR Ortalyq referendým komıssııasy saýalymyzǵa joldaǵan jaýabynda málimdedi. 

Komıssııa málimetinshe, elimizde 12 461 796 daýys berýshi tirkelgen. Zań boıynsha, osy sannan 1% artyq bıýlleten ázirlenedi. Demek, 12 586 414 bıýlleten bolmaq.

Alaıda jyrtyp ne búldirip alsa, azamattarǵa jańa bıýlleten berilmeıdi.

— Ýchaskelerge azamattar esepten shyǵarý kýáligimen kelýi múmkin. Bul — tirkelgen mekenjaıynan basqa jerde daýys beretinderge usynylatyn qujat. Ne bolmasa, ýchaskelerge bir táýlikke tirkelgender de bolýy yqtımal. Bıýlletenderdiń 1% artyq jasalatyn sebebi  sol. Joǵaryda jazylǵan eki toptaǵy azamattar úshin qarastyrylǵan. Al bıýlletenin búldirip alǵandarǵa ekinshisi berilmeıdi, — delingen habarlamada.

Aıta keteıik buǵan deıin tirkeýi joq azamattar referendýmǵa qalaı qatysatynyn jazǵanbyz.