Bıýlletenge «Bárine qarsymyn» baǵany nege engizildi – OSK tóraǵasy basty sebebin atady

ASTANA. QazAqparat – BAQ ókilderiniń qatysýymen ótken baspasóz maslıhatynda Ortalyq saılaý komıssııasynyń tóraǵasy Nurlan Ábdirov bıýlletenge nelikten «Bárine qarsymyn» baǵany engizilgenin túsindirdi, dep habarlaıdy QazAqparat tilshisi.

«Onyń bir ǵana qajettiligi bar. «Saılaýshy aıaǵymen daýys beredi» degen uǵym bar. Sondyqtan bul jerde áńgime adamdardyń saılaý ýchaskelerine kelýine qatysty. Saılaýshy ýchaskege keledi, bıýlleten alady, daýys berdi. Bizdiń zańda bıýlletendi búldirgenderge qatysty jaýapkershilik joq. Endi saılaýǵa kelip, «Bárine qarsymyn» dep daýys berý – bul pozıtsııa. Azamattyq pozıtsııa. Saılaýǵa barmaı, óziniń kózqarasyn bildirýge de bolady. Biraq bul joly azamattar ýchaskege baryp turyp, men «bárine qarsymyn» dep, óziniń pozıtsııasyn kórsetti», - dep túsindirdi OSK tóraǵasy.

Nurlan Ábdirovtiń paıymynsha, «Bárine qarsymyn» baǵanyn tańdaǵan azamattardyń pikiri memleket pen saıası partııalardyń oılanýyna sebep bolady.

«Sonshama adam kelip, «bárine qarsymyn» dep daýys berip ketti. Ol bıýlletendi búldirgen joq. Bul grafa bolmaǵan kezde jaǵdaı qalaı boldy?! Bárine qarsymyn dep óz qolymen jazatyn. Ondaı bıýlleten jaramsyz dep sanalatyn. Al bul jaramdy bıýlleten. Óıtkeni, daýys berýshiniń «Bárine qarsymyn» degen pozıtsııasy bar. Erteń ol memleketke qajet nárse. Memleket «Olar nege bárine qarsymyn?» dep daýys berdi dep oılanady. Sol sııaqty bul saıası partııalarǵa da oı salady», - dep túıindedi Nurlan Ábdirov.