Bıýlletenderde saılaýǵa túsetin azamattardyń aty-jónderiniń qazaq jáne orys tilinde durys jazylýyn aımaqtyq saılaý komıssııalary qadaǵalaıtyn boldy
TANA. 25 qarasha. QazAqparat /Aıdar Ospanalıev/ - «Kelesi jyly elimizde ótetin saılaýlar barysynda bıýlletenderde kórsetiletin saılaýǵa túsetin azamattardyń aty-jónderi men teginiń qazaq jáne orys tilinde durys jazylýyn tolyqtaı aımaqtyq saılaý komıssııalary qadaǵalaıtyn bolady»,-
deıdi Ortalyq saılaý komıssııasynyń tóraǵasy Qýandyq Turǵanqulov. Bul týraly ol búgin elordada ótip jatqan Qazaqstan Respýblıkasy Parlamenti Májilisiniń jáne máslıhattarynyń depýtattarynyń saılaýyna ázirlik jáne ony ótkizý máselelerine arnalǵan semınar-keńes barysynda aıtty.
Tóraǵanyń sózine qaraǵanda, Parlament Májilisi depýtattarynyń kezekten tys saılaýynda paıdalanylatyn bıýlletenderdi «Qazaqstan Respýblıkasy Ulttyq bankiniń banknot fabrıkasy» sharýashylyq júrgizý quqyǵyndaǵy respýblıkalyq memlekettik kásiporny daıyndaıdy. Biz bul kásiporynnyń qyzmetin osy ýaqytqa deıin paıdalanyp kelemiz. «Al máslıhat depýtattarynyń saılaýynda paıdalanylatyn bıýllletenderge keletin bolsaq, bul rette osy bıýlletenderdegi mátinge jedel ári ýaqytynda ózgerister engizip, qatelikter jiberilgen jaǵdaıda olardy birden túzetip otyrýǵa qajetti múmkindikterdi jasaý maqsatynda jáne bıýlletenderdi ýaqytynda daıyndaý men olardy aımaqtarǵa jyldam jetkizý úshin elimizdiń aımaqtarynan 4 baspa belgilendi»,-dedi OSK tóraǵasy.
