Bıýdjettiń kiris bóligin qamtamasyz etý baǵytynda jumysty edáýir kúsheıtý qajet – Oljas Bektenov
ASTANA. KAZINFORM — Respýblıkalyq bıýdjettiń kiris bóligin qamtamasyz etý baǵytynda jumysty edáýir kúsheıtý qajet. Bul týraly Úkimet otyrysynda Premer-Mınıstr Oljas Bektenov aıtty.
«Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynyń árbir joly – qazirgi zamannyń shynaıy talaptary men syn-qaterlerine jaýap beretin mańyzdy ári der kezinde jarııalanǵan qujat. Prezıdenttiń Joldaýyn sapaly iske asyrý bizdiń basty mindetimiz. Memleket basshysy atap ótkendeı, bul maqsatqa ekonomıkanyń qurylymyn ózgertý arqyly qol jetkize alamyz. Salalardaǵy mundaı ózgerister qazirdiń ózinde taý-ken sektorynyń úlesin azaıtyp, óńdeý ónerkásibiniń ósý qarqynyn arttyrýǵa múmkindik berdi. Sondaı-aq biz joǵary deńgeıde óńdelgen ónim shyǵarýǵa basymdyq beretin bolamyz. Bul salanyń áleýeti úlken», - dedi otyrysta ashqan Premer-Mınıstr.
Osy rette Oljas Bektenov Memleket basshysy Úkimet pen ákimdikter barynnsha kóńil bólýi tıis problemalardy naqty belgilep bergenin eske saldy.
«Barlyq memlekettik organdar Prezıdent aıtqan tapsyrmalardy jan-jaqty pysyqtap, qoıylǵan mindetterdi sheshýdiń naqty joldaryn aıqyndaýy qajet. Bul rette biz bıýdjet qarajatyn ońtaıly jumsaýǵa barynsha kóńil bólýimiz kerek. Respýblıkalyq bıýdjettiń kiris bóligin qamtamasyz etý baǵytynda jumysty edáýir kúsheıtý qajet. Joldaýda ınvestıtsııalyq ahýaldy jaqsartý, eldiń ónerkásiptik áleýetin ashý, ınfraqurylymdyq problemalardy sheshý jónindegi maqsattar kórsetilgen», - dedi Úkimet basshysy.
