Bıýdjettiń ıgerilýi: Parlament palatalarynyń birlesken otyrysy bastaldy

Jıynda Májilis pen Senat depýtattary Úkimettiń jáne Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly esepterin qaraıdy.

Aıta keteıik, jaqynda esepterdi Senatta talqylaý barysynda byltyrdyń qorytyndysy boıynsha ulttyq ekonomıkanyń ósimi 6,5 paıyzdy quraǵany atalyp ótti. Bul oń dınamıka ınvestıtsııa kóleminiń artýynyń, iskerlik belsendiliktiń jandanýynyń jáne óńdeý ónerkásibi sektorynyń nyǵaıýynyń nátıjesinde qamtamasyz etilgeni de nazarǵa alyndy.

Sonymen qatar saqtalyp otyrǵan bıýdjettik yntalandyrý ınflıatsııalyq qysymdy kúsheıtip, halyqtyń naqty tabysynyń tómendeýine áser etti. Osyǵan baılanysty senatorlar bıýdjetti josparlaýdyń sapasyn arttyrý qajet ekenin aıtyp, birqatar júıeli máselege nazar aýdardy.

10 maýsym kúni Májilistiń jalpy otyrysynda Úkimettiń 2025 jylǵy respýblıkalyq bıýdjettiń atqarylýy týraly esebin talqylaý kezinde Qarjy mınıstri Mádı Takıev 2025 jyly áleýmettik mindettemeler tolyq oryndalǵanyn aıtty. 

Buǵan deıin Májilis tóraǵasy Erlan Qoshanov Qazaqstan Respýblıkasy Parlament palatalarynyń birlesken otyrysyn shaqyrý týraly Ókimge qol qoıǵanyn jazǵan edik. 

Aıta keteıik, Ulttyq bank tóraǵasy Tımýr Súleımenov 2025 jyly elimizdiń altyn-valıýta rezervteri 42,8 paıyzǵa óskenin málim etti.