Bıýdjettik uıym nysandaryna kún panelderinen elektr energııasyn alý múmkindigi berilmek

ASTANA. KAZINFORM — Premer-mınıstrdiń birinshi orynbasary Roman Sklıar Májilis depýtattarynyń bıýdjettik uıym nysandaryna kún panelderinen elektr energııasyn alý múmkindigin berýge qatysty saýalyna jaýap berdi. 

— Elektr energııasynyń bólshek saýda naryǵynyń qoldanystaǵy modeli aıasynda netto tutynýshylardy qospaǵanda tutynýshylarǵa elektrmen jabdyqtaýdy elektrmen jabdyqtaýshy uıymdar kórsetedi. Áleýmettik mańyzy bar obektiler memlekettik satyp alý rásimderi negizinde biregeı jetkizýshiden elektr energııasyn satyp alý arqyly júzege asyrady, — dedi Roman Sklıar.

Onyń aıtýynsha, kún qondyrǵylary operatorynan tikeleı elektr energııasyn satyp alý múmkindigin berýge baǵyttalǵan jańa mehanızmdi engizý elektr energııasynyń bólshek saýda naryǵynyń jumys isteý bóliginde zańnamamyzdyń erekshelikterin eskere otyryp, odan ári jan-jaqty zertteýdi qajet etedi. Osyǵan baılanysty tıisti sheshimder Germanııanyń tájirıbesin qosa alǵanda, halyqaralyq tájirıbeni taldaý nátıjeleri boıynsha ázirlenedi.

— Óz kezeginde bıýdjettik uıymdar ınvestorlardan elektr energııasyn satyp almaı kún panelderin ózderi paıdalanǵan jaǵdaıda olardy nettotutynýshylarǵa jatqyzý ESKO mehanızmin qoldaný arqyly múmkin bolady. Atalǵan mehanızmdi paıdalaný qazirgi ýaqytta únemdelgen bıýdjettik qarajatty paıdalanýdy jáne qaıtarýdy qosa alǵandaǵy zańnamanyń jekelegen erejelerimen shekteledi. Atalǵan shekteýlerdi joıý máseleleri Májiliste qaralyp jatqan energııa tıimdiligi máseleleri boıynsha zań jobasynyń aıasynda kózdelgen. Onda memlekettik mekemelerde energııalyq qyzmet kelisimsharttaryn engizý, sondaı-aq olardy josparlaý jáne iske asyrý qaǵıdalaryn ýákiletti organmen bekitý boıynsha normalar da usynylady, — dedi birinshi vıtse-premer.

Buǵan deıin elimizde 2027 jylǵa qaraı elektr energııasyna ishki qajettilik tolyq jabylatynyn jazǵan edik.