Bıýdjettik kredıtterdi óteý tártibi naqtylandy

ASTANA. KAZINFORM – Úkimet Ulttyq qorǵa qatysty qoldanystaǵy qaǵıdalarǵa ózgerister men tolyqtyrýlar engizdi.

Atap aıtqanda, 2025 jylǵy 2 shildedegi №500 qaýlymen bekitilgen Ulttyq qordy qalyptastyrý jáne paıdalaný qaǵıdalary jańa tarmaqpen tolyqtyryldy.

– Ulttyq qordan beriletin nysanaly transfertter esebinen respýblıkalyq bıýdjetten 2024 jylǵy 1 qańtarǵa deıin bólingen bıýdjettik kredıtterdi óteý jasalǵan kredıttik sharttarda kórsetilgen merzimderde respýblıkalyq bıýdjetke aýdarý arqyly júzege asyrylady, - delingen qujatta.

Sonymen qatar josparlanǵan bıýdjet jasalǵan kezde memlekettik organdar buryn berilgen kredıtterden qaıtarylatyn aqshany esepteıdi. Sol aqshaǵa teń somany Ulttyq qorǵa qaıta jiberýdi bıýdjetke aldyn ala engizedi.

Aıta ketý kerek jańa redaktsııaǵa sáıkes, maqsatsyz paıdalanylǵan nysanaly transfertter men bıýdjettik kredıtter memlekettik aýdıt qorytyndysy shyqqannan keıin úsh aı ishinde mindetti túrde Ulttyq qorǵa nemese tıisti bıýdjetke qaıtarylýy tıis.

Budan bólek, Ulttyq qordan bólingen transfertter esebinen berilgen bıýdjettik kredıtterdi de Ulttyq qorǵa qaıtarý talaby naqtylandy.

– Bıýdjettik josparlaý jónindegi ortalyq ýákiletti organ esepti jyldan keıingi jyldyń sońyna deıin respýblıkalyq bıýdjetti qalyptastyrý nemese naqtylaý kezinde Ulttyq qorǵa bıýdjettik kredıtterdiń qaıtarylýyn qamtamasyz etedi, - dep atap ótilgen qaýlyda.

Qaýly 16 sáýir kúshine enedi.

Aıta keteıik, 2026 jylǵy I toqsannyń qorytyndysy boıynsha memlekettik bıýdjet kiristeri 104,4%-ǵa oryndaldy. Josparlanǵan 6,2 trln ornyna 6,4 trln teńge tústi; jospar 268,7 mlrd teńgege asyra oryndaldy. 2025 jylmen salystyrǵanda ósim 930,6 mlrd teńgeni (+16,9%) qurady Respýblıkalyq jáne jergilikti bıýdjetter josparly kórsetkishterdi asyra oryndady.

Buǵan deıin Qazaqstannyń bıýdjeti jospardan asyp túskenin jazǵan edik.