Bıýdjettiń jumsalýynda 86,6 mlrd teńgeniń qarjylyq buzýshylyqtary anyqtaldy

ASTANA. QazAqparat - 2018 jyldyń 8 aıynda 86,6 mlrd teńgege qarjylyq buzýshylyqtar anyqtaldy. Bul týraly búgin Úkimettiń selektorlyq rejimdegi otyrysynda QR Qarjy mınıstri Baqyt Sultanov aıtty.  Bul onyń Astana ákimi qyzmetine taǵaıyndalardyń aldyndaǵy mınıstr retindegi sońǵy baıandamasy bolatyn, dep habarlaıdy QazAqparat tilshisi.

«Bıýdjet qarajatynyń jumsalýy turaqty baqylaýda. Esepti kezeńde bıýdjet qarajatynyń 923 mlrd teńgesi aýdıtorlyq sharalarmen qamtyldy. Qarjylyq buzýshylyqtardyń ótken jyldyń uqsas kezeńimen salystyrǵanda tómendeýi baıqalady. Barlyǵy 86,6 mlrd teńgege qarjylyq buzýshylyqtar anyqtalǵan. Osy somanyń 53,3 mlrd teńgesi aýdıt barysynda qalpyna keltirildi», - dedi ol.

Sonymen qatar ol jekeshelendirý máselesine toqtaldy.

«Keshendi jospardyń 887 nysanynan aǵymdaǵy jyldyń 1 qyrkúıegindegi jaǵdaı boıynsha  515 nysan satýǵa qoıylǵan bolatyn. Onyń ishinde somasy 246 mlrd  teńgeniń 435 nysany satyldy. Satý ekonomıkalyq jaǵynan tıimsiz bolýyna jáne úsh nysannyń saýda-sattyq nátıjeleri boıynsha satylmaǵandyǵyna baılanysty, 269 nysan qaıta uıymdastyrý jáne taratý satysynda. Osylaısha, aǵymdaǵy jyldyń 1 qyrkúıegindegi qaıta uıymdastyrylǵan jáne taratylǵan nysandardy eskere otyryp, Jekeshelendirýdiń keshendi jospary 79,4 paıyzǵa oryndaldy», - dedi Baqyt Sultanov.

Jalpy alǵanda, mınıstrdiń aıtýynsha, jekeshelendirý protsesi satý kestesine sáıkes júrip jatyr.

«Aǵymdaǵy jyldyń aıaǵyna deıin taǵy da 70 nysandy, onyń 15 respýblıkalyq menshik, 24 kommýnaldyq menshik nysanyn, 31 ulttyq holdıngter men ulttyq kompanııalardyń aktıvteri satýǵa qoıylady»,-  dedi mınıstr.

Eske sala ketsek, QR Prezıdentiniń Jarlyǵymen Baqyt Sultanov Astana qalasynyń ákimi bolyp taǵaıyndaldy.