Bıýdjettiń shyǵysyn qysqartýdy josparlap otyrmyz – Erulan Jamaýbaev

ASTANA. QazAqparat – Respýblıkalyq bıýdjetten nysanaly transfertter bólý týraly sheshimdi Prezıdent qana qabyldaıtyn bolady. Bul týraly QR Premer-Mınıstriniń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Bıýdjetti josparlaý protsesinde shyǵyndar ońtaılandyrylady jáne bıýdjettiń teńgerimdiligin qamtamasyz etýdi kózdep otyrmyz. Jaqyn arada biz bıylǵa arnalǵan respýblıkalyq bıýdjettiń shyǵys parametrleri men baǵyttaryn naqtylaımyz. Bul rette Prezıdenttiń saılaýaldy baǵdarlamasy men Qazaqstan halqyna Joldaýynda aıtylǵan bastamalary men tapsyrmalaryna basa nazar aýdarylady», - dedi ol vedomstvonyń keńeıtilgen alqa májilisinde.

Sondaı-aq, aldaǵy 3 jyldyń bıýdjetin qalyptastyrý jumysy jalǵasatynyn aıtty.

«Bul jerde bıýdjet tıimdiligin arttyrý jáne memleket qarjysynyń turaqtylyǵyn nyǵaıtý jónindegi tapsyrmalar eskeriledi. Bul baǵyttaǵy Bıýdjet kodeksiniń jańa jobasynda barynsha júıeli sheshimder kórinis tabatyn bolady. Bul bıýdjet protsesin ońaılatý jáne fıskaldyq sharalardy ortalyqsyzdandyrý, mańyzdy áleýmettik mańyzy bar, jalpyhalyqtyq jobalardy iske asyrýǵa Memleket basshysynyń sheshimimen ǵana nysanaly transfertter bólý, memlekettik organdar men kvazımemlekettik kompanııalar qyzmetiniń eseptiligi men ashyqtyǵyn qamtamasyz etý jáne bıýdjettik jáne strategııalyq josparlaýdy tolyq tsıfrlandyrý máselelerin qozǵaıdy», - dep túsindirdi Erulan Jamaýbaev.