Bıýdjettiń mıllıardtaǵan qarjysy jumsalǵan: «Taraz» Hımpark» AEA túıitkili qaraldy
Naqtyraq aıtsaq, mınıstr Beıbit Atamqulovtyń, Jambyl oblysynyń ákimi Berdibek Saparbaevtyń qatysýymen Shý aýdanynda arnaıy keńes ótti. Jıynda kóterilgen máselelerdiń biri - «Taraz» Hımpark» arnaıy ekonomıkalyq aımaǵynyń basqarýshy kompanııasyna qatysty kóptegen syn aıtyldy.
«Sońǵy jyldary is júzinde eshqandaı ózgeris joq. Ótken jyly qant zaýytynyń qurylysy bastalýy kerek edi, áli sol qalpynda tur. Mıllıardtaǵan bıýdjet qarjysy jumsalǵanymen, nátıjesi joq deýge bolady. Sonymen qatar, munda úlken jalaqysy bar kóptegen shtat ashylǵan. Eger jumys isteıtin jobalary bolmasa, olar ne úshin aqsha alyp otyr?» – dedi oblys ákimi Berdibek Saparbaev.
Belgili bolǵandaı, basqarýshylar shtaty 147-den 75 adamǵa deıin qysqartylǵan. Munda 16 nysan paıdalanýǵa berilgen jáne olar tek ınjenerlik ınfraqurylymǵa ǵana qatysty.
Aımaq basshysy mınıstrge «Taraz» Hımpark» AEA-ny damytý máselesin qarastyrý úshin arnaıy selektorlyq keńes shaqyrýdy usyndy. Usynys qabyldandy.
«Kelisemin, salynǵan qarajat aýqymdy, olardyń jumsalýy boıynsha esep berý kerekpiz», - dep atap ótti Beıbit Atamqulov.
Aıta keteıik, «Taraz» Hımpark» – bul Qazaqstan aýmaǵyndaǵy onynshy arnaıy ekonomıkalyq aımaq. «TARAZ INVEST-2012» halyqaralyq forýmynda «Samuryq-Qazyna» UÁQ» AQ-ǵa qarasty «Birikken hımııalyq kompanııa» JShS jobanyń tusaýyn kesken bolatyn. Onda ınvestorlar úshin qolaıly jaǵdaılar, qolaıly preferentsııalar jáne qajetti resýrstar men ınfraqurylymdy qamtamasyz ete otyryp, joǵary tıimdi tehnologııalarǵa negizdelgen jańa hımııalyq zaýyttar qurý josparlanǵan bolatyn. Ol úshin 505 gektar jer qarastyrylǵan.
Basqosý sońynda oblys ákimi Berdibek Saparbaev Jambyl oblysynda bıtým shyǵaratyn zaýyt salýdy usyndy.
«Jer bólý jáne ınfraqurylym júrgizýde eshqandaı másele bolmaıdy. Sondaı-aq, qurylys uıymdary bıznestiń áleýmettik jaýapkershiligi sııaqty tujyrymdamany umytpaýy tıis. Jergilikti jurtshylyqtyń áleýmettik máselelerin sheshýge kómektesińizder», - dedi aımaq basshysy.
