Bıýdjettiń 101 mlrd teńgesi ıgerilmeı qalǵan – mınıstr

ASTANA. QazAqparat – QR Qarjy mınıstri Erulan Jamaýbaev bıýdjet qarajatyn ýaqytyly ıgermegen mınıstrlikter men óńirlerdi atady, dep habarlaıdy QazAqparat tilshisi.

«Memlekettik bıýdjettiń shyǵystary 95,8%-ke, respýblıkalyq bıýdjettiń shyǵystary – 96,5%-ke, jergilikti bıýdjetterdiń shyǵystary 96,6%-ke atqaryldy. Respýblıkalyq bıýdjet boıynsha 3,4 trln teńge somasyna shyǵystar júrgizildi. 123 mlrd teńge jumsalmady, onyń ishinde 22 mlrd teńge únemdelse, 101 mlrd teńge ıgerilmeı qalǵan», - dedi E. Jamaýbaev Úkimettiń búgingi otyrysynda.

Mınıstrdiń aıtýynsha, eń kóp ıgerilmegen soma ishki ister, qarjy, ǵylym jáne joǵary bilim, aqparat jáne qoǵamdyq damý mınıstrlikterinde baıqalǵan.

«Qarjy ıgerilmeýiniń negizgi sebepteri:tólem naqty kórsetilgen qyzmet kólemi boıynsha júrgizilgen; konkýrstyq rásimderdi uzaq merzimde ótkizý; sharttardy, qosymsha kelisimderdi uzaq jasasý; bıýdjettik baǵdarlamalardy (kishi baǵdarlamalardy) iske asyrý jónindegi normatıvtik quqyqtyq aktilerdi ýaqytyly qabyldamaý; shot-faktýralar, atqarylǵan jumys aktileriniń ýaqytyly ótkizilmeýi; esepti aıda qarajatty jumsaý qajettiliginiń bolmaýy», - dep túsindirdi spıker.

Jergilikti bıýdjetterdiń shyǵystary 1,3 trln teńgeni quraǵan. Onyń ishinde 45 mlrd teńge jumsalmaǵan.

«Bıyl óńirlerge 1,2 trln teńge nysanaly transfert kózdelgen. Olarǵa 1 naýryzǵa deıin 56 mlrd teńge bólingen. Onyń 80,1%-i ıgerilgen, 11 mlrd teńge ıgerilmedi. Eń kóp ıgerilmeý Astana jáne Almaty qalalarynda, Pavlodar jáne Abaı oblystarynda qalyptasty. Onyń negizgi sebepteri - qadaǵalaý organdarynyń nusqamalary, konkýrstyq rásimderdi uzaq ótkizý, oryndalǵan jumystar aktilerin ýaqtyly usynbaý», - dedi Qarjy mınıstri.

Aıta keteıik, qańtar-aqpan aılarynda memlekettik bıýdjetke 3,4 trln teńge tústi.