Bıýdjettik saıasat negizinen memlekettik qarjy qurylymdarynyń teńgerimdiligin qamtamasyz etýge baǵyttalady - S. Ahmetov
ASTANA. 23 qazan. QazAqparat - Bıýdjettik saıasat negizinen memlekettik qarjy qurylymdarynyń teńgerimdiligin qamtamasyz etýge baǵyttalatyn bolady. Búgin Parlament Májilisiniń jalpy otyrysynda «2014-2016 jyldarǵa arnalǵan respýblıkalyq bıýdjet týraly» zań jobasynyń maquldanýyna qatysty pikirin bildirgen QR Premer-Mınıstri Serik Ahmetov osylaı málim etti.
Úkimet basshysy kelesi 2014 jyly álemdik ekonomıkadaǵy daǵdarys kórinisteriniń jalǵasýyna oraı ekonomıkany kontrtsıkldy retteý sharalary jalǵasatynyn málimdedi. S. Ahmetovtyń aıtýynsha, josparlanǵan deńgeıde áleýmettik-ekonomıkalyq damýdy qamtamasyz etýge de Úkimet barlyq kúshin salady.
«Jalpy, orta merzimdi kezeńge arnalǵan bıýdjettik saıasat negizinen memlekettik qarjy qurylymdarynyń teńgerimdiligin qamtamasyz etýge baǵyttalatyn bolady. Al bıýdjettik saıasattyń negizgi basymdyqtaryna áleýmettik jańǵyrý, óńirlerdi damytý, ekonomıkany ártaraptandyrý, shaǵyn jáne orta bıznesti qoldap, damytý, sonymen qatar, ındýstrııalandyrýdyń serpindi damýyna jaǵymdy orta qalyptastyrý bolyp tabylady», - dedi Premer-Mınıstr.
