Bıýdjettik sala qyzmetkerleriniń jalaqysy 30 protsentke qalaı kóteriledi

ASTANA. QazAqparat - Memleket basshysy Nursultan Nazarbaev 1 shildeden bastap aılyǵy tómen bıýdjettik sala qyzmetkerleriniń jalaqysyn 30 protsentke kóterýdi tapsyrdy. Parlament Májilisi tóraǵasynyń orynbasary Vladımır Bojko atalǵan bastamanyń qalaı iske asatynyn aıtyp berdi, dep xabarlaıdy QazAqparat tilshisi.

"Negizi, aldymen bıýdjettik sala qyzmetkerleriniń tómengi aılyǵyn anyqtap alý qajet. Máselen, men ishki ister organdaryna jumysqa kelgende jalaqy 28 000 teńgedeı boldy. Qazir órt sóndirýshiler 50 000 - 60 000 teńgeniń aınalasynda alady. Al eńbek ótili barlarǵa 110 000 - 120 000 teńge beriledi. Sonda bıýdjettik sala qyzmetkeriniń eń tómengi jalaqysy qandaı? Ony qalaı esepteımiz? Zańmen ondaı kórsetkish bekitilmegen. Men ózim kórgen joqpyn. Qazir qarjy mınıstrligi ony anyqtap jatqan shyǵar. Eń tómengi kúnkóris deńgeıin ala ma? Basqa bir kórsetkish engizile me? Osyny anyqtap alýymyz qajet" - dedi V.Bojko QazAqparat tilshisine bergen suxbatynda.

Onyń aıtýynsha, jalaqyny kóterýge qosymsha 1 trıllıonǵa jýyq teńge bólinse, el ekonomıkasyna qan júgiredi. Sebebi xalyq ol aqshany jumsaǵanda shaǵyn jáne orta bıznes jandana túsedi. "Eń bastysy, jalaqy kóterýdiń tártibin anyqtap alý qajet. Endi, 1 trıllıon teńge Ulttyq qordan bólinse, bıýdjet týraly zańnamaǵa ózgeris engizýge týra keledi. Demek, olar (QR Qarjy mınıstriligi - avt.) bizge keledi. Sol kezde bıýdjettik sala qyzmetkerleriniń jalaqysyn ósirýdiń naqty tártibi de, ol ústemeaqyny alatyn azamattardyń sanattary da belgili bolady", - dep atap kórsetti V.Bojko.

Aıta keteıik, keshe "Nur Otan" partııasynyń XVIII sezinde QR Prezıdenti Nursultan Nazarbaev tómen jalaqy alatyn bıýdjettik sala qyzmetkerleriniń aılyǵyn 30 protsentke kóterýdi tapsyrdy. «Osy jyldan bastap qańtar aıynda bazalyq aılyq mólsherin bir jarym esege ósirdik. Muǵalimderdiń aılyǵyn 30 paıyzǵa, biliktiligin arttyrǵan ustazdarǵa 50 paıyzǵa arttyrdyq. Demek, osy sanattaǵy azamattardyń kirisi aıtarlyqtaı ósti. Bul baǵdarlama bir mıllıon azamattyq qyzmetkerdi qamtıdy. Osy jyldyń 1 shildesinen bastap bıýdjet salada jumys isteıtin aılyǵy tómen qyzmetkerlerdiń jalaqysyn 30 paıyzǵa arttyrýdy tapsyramyn. Biz olardy qoldaýymyz kerek», - dedi N.Nazarbaev. Budan bólek, ákimdik qyzmetkerleriniń jalaqysy 25 protsentke kóteriledi. Osy maqsatta 1 trıllıonǵa jýyq qarjy bólinedi.

Al jýrnalısterge suxbat bergen QR Densaýlyq saqtaý mınıstri Eljan Birtanov Prezıdent tapsyrmasy aıasynda qaı qyzmetkerlerdiń jalaqysy kóteriletinin aıtqan bolatyn.