Bıýdjettik mekemelerde energııany tıimdi tutyný tártibi bekitilmek

NUR-SULTAN. QazAqparat - Ádilet mınıstrliginde «QR keıbir zańnamalyq aktilerine energııa únemdeý jáne energııa tıimdiligin arttyrý máseleleri boıynsha ózgerister men tolyqtyrýlar engizý týraly» zań jobasynyń tujyrymdamasy tanystyryldy, dep habarlaıdy QazAqparat tilshisi.

«2016 jyly Búkilálemdik bank «energııany únemdeý» talaby boıynsha álemniń 111 eline baǵalaý jáne taldaý júrgizip kórgen bolatyn. Taldaý qorytyndysyna sáıkes, Qazaqstan «Bıýdjettik jáne memlekettik sektorda energııa únemdeýdi retteý» ındıkatory boıynsha tómen baǵa aldy», - dedi Ádilet mınıstrliginde ótken vedomstvoaralyq komıssııanyń kezekti otyrysynda QR Indýstrııa jáne ınfraqurylymdyq damý vıtse-mınıstri Amanııaz Erjanov.

Osyǵan baılanysty mınıstrlik memlekettik jáne kvazımemlekettik sektorda birqatar sharalardy qolǵa alýdy usynyp otyr.

«Aldymen, qatań retteýdi qolǵa alý kerek. Atap aıtqanda, bıýdjettik mekemelerde energııany tutyný normatıvterin bekitý, ony saqtamaǵan basshylardyń jaýapkershiligin kúsheıtýdi usynamyz. Halyqaralyq tájirıbege súıensek, energııa únemdeý júıesiniń keń taraǵan quraldarynyń biri - energoaýdıt. Osy ýaqytqa deıin júrgizilgen 525 energoaýdıt qorytyndysy bekitilgen erejelerdiń oryndalmaı jatqanyn kórsetip otyr. Energoaýdıt sapasyzdyǵyna energoaýdıtorlardyń biliktiliginiń tómendigi sebep bolýda», - dedi vıtse-mınıstr.

Amanııaz Erjanovtyń aıtýyna qaraǵanda, ár organǵa júrgiziletin energoaýdıtterdi - tolyq energoaýdıt, maqsatty jáne ekspress-energoaýdıt dep úshke bólý kerek.

«Qazirgi tańda jergilikti atqarýshy organdarmen birge aýmaqtardy damytý baǵdarlamasyna saı, energııa tıimdiligin arttyrýdyń bes jyldyq aımaqtyq jospary bekitilgeli jatyr. Kóp jaǵdaıda mundaı baǵdarlamalarǵa qarajat bólinbeıdi. Aqyry baǵdarlamanyń sońy qumǵa sińgen sýdaı joq bolady», - dedi vıtse-mınıstr.