Bıýdjettik mekeme qyzmetkerleriniń jalaqysy 2011 jyldyń shildesinen bastap 30 paıyzǵa kóteriledi - G. Ábdihalyqova
ASTANA. 25 qarasha. QazAqparat /Qanat Mámetqazyuly/ - Bıýdjettik mekeme qyzmetkerleriniń jalaqysy 2011 jyldyń shildesinen bastap 30 paıyzǵa kóteriledi.
Bul týraly búgin QR Parlamenti Senatynyń jalpy otyrysynda «Qazaqstan Respýblıkasynda zeınetaqymen qamsyzdandyrý týraly» zańyna ózgerister engizý týraly» zań jobasy boıynsha baıandama jasaǵan Eńbek jáne halyqty áleýmettik qorǵaý mınıstri Gúlshara Ábdihalyqova málim etti.
«Bıýdjettik mekeme qyzmetkerlerine, ıaǵnı muǵalimderdiń, dárigerlerdiń, áleýmettik qyzmetkerlerdiń jalaqysyn 30 paıyzǵa kóterý kelesi jyldyń 1 shildesinen qarastyrylyp otyr. Ótken joly Parlament 2011-2013 jyldarǵa arnalǵan respýblıkalyq bıýdjet týraly zańdy qabyldady. Osy zańda atalǵan sharalarǵa baǵyttalǵan barlyq shyǵystar qarastyryldy», - dedi Gúlshara Ábdihalyqova.
