Bıýdjettik qarajatty qymqyrǵany úshin «Mejregıonkomplekt-Astana» JShS dırektory ustaldy
ASTANA. QazAqparat - Astana qalasy memlekettik kiris departamenti ekonomıkalyq tergeý qyzmeti QR QK 176-baby 3-bóligi «b» tarmaǵy boıynsha «Mejregıonkomplekt-Astana» JShS bas dırektory P.A. Enınge qatysty QR Energetıka mınıstrliginiń shaǵymy boıynsha qylmystyq isti aıaqtady.
Vedomstvonyń aqparat qyzmetinde habarlanǵandaı, P.A. Enın 2011 jyl kezeńinde Aqmola oblysynda «Býrabaı» geofızıkalyq observatorııasyn qaıta kóshirý jumys jobasy boıynsha qurylys-montajdaý jumystaryn júrgizýge memlekettik satyp alý týraly jasalǵan shart aıasynda QR Indýstrııa jáne jańa tehnologııalar mınıstrligi bólgen 240 mln. teńgeden astam bıýdjet qarajatyn qymqyrǵan.
Qazirgi ýaqytta qylmystyq is Astana q. Saryarqa aýdany №2 aýdandyq sotynyń qaraýynda jatyr. Kúdikti Enın qamaýǵa alyndy.
Úrdis nátıjeleri jurtshylyqqa jetkiziletin bolady, dep atap ótti Astana qalasy boıynsha MKD.
