Bıýdjettik baǵdarlamalardy kelisýdiń jekelegen kezeńderi qysqartylady
«Bıýdjettik baǵdarlamalardyń iske asyrylýyn jeńildetý maqsatynda olardy kelisýdiń mynadaı jekelegen kezeńderin alyp tastaý usynylady. Osy oraıda strategııalyq josparlar ázirlemeıtin memlekettik organdardyń bıýdjettik baǵdarlamalaryn Ulttyq ekonomıka mınıstrligimen kelisýsiz bekitý eskerilgen. Bul turǵyda Qarjy mınıstrligimen kelisý qalady. Al bıýdjetti túzetý kezinde bıýdjettik baǵdarlamalarǵa Ulttyq ekonomıka mınıstrligimen kelisýsiz ózgerister engizý qamtyldy. Osy baǵytta da Qarjy mınıstrligimen kelisý saqtalady. Bıýdjettik baǵdarlamalar ishinde qarajatty qaıta bólý kezinde memlekettik organdardyń bastamasymen bıýdjettik baǵdarlamalarǵa Ulttyq ekonomıka mınıstrligimen jáne Qarjy mınıstrligimen kelisýsiz, biraq Qarjy mınıstrligine habarlap, ózgerister engizý de usynylady»,-dedi Ulttyq ekonomıka mınıstri Tımýr Súleımenov zań jobasy boıynsha baıandamasynda.
Budan bólek, nysanaly damý transfertteriniń nátıjeleri týraly kelisimderdi alyp tastaý usynylyp otyr. Búginde olar bıýdjettik baǵdarlamalardy qaıtalaıdy. Nátıjesinde, ortalyq jáne jergilikti deńgeılerdegi bir jarym myńnan astam qujat qysqartylady.
«Ortalyq memlekettik organdardyń ákimshilik shyǵystaryn jalpy lımıtpen josparlaý usynylyp otyr. Bul bıýdjettik ótinim daıyndaýdy jeńildetedi jáne usynylatyn qujattardyń kólemin qysqartady»,-dedi mınıstr.
Sonymen qatar bıýdjettik baǵdarlamalardy iske asyrý kezinde derbestikti keńeıtý sheńberinde bıýdjettik baǵdarlamalar arasynda bıýdjetti naqtylaýsyz (Úkimettiń qaýlysy arqyly) qarajatty qaıta bólý eskerilgen. Muny qarajat ıgerilmegen kezde 10 paıyzdan aspaıtyn kólemde iske asyrý usynylady. Jalpy sıpattaǵy transfertter aıasynda eń tómengi qarjylandyrý kólemin jergilikti atqarýshy organdardyń qaıta bólýi, sondaı-aq bir bıýdjettik baǵdarlama ishinde aǵymdaǵy kishi baǵdarlama boıynsha únemdeýdi damý jónindegi kishi baǵdarlamaǵa qaıta bólý múmkindigin kózdeý usynylady.
«Bulardyń barlyǵy qarajatty jyl boıy sapaly ıgerýge múmkindik beredi»,-deıdi Tımýr Súleımenov.
Munymen qosa, memlekettik-jekeshelik áriptestik jobalaryn josparlaý rásimderin jeńildetý maqsatynda barlyq protsesti 5-ten 3 kezeńge deıin qysqartý usynylyp otyr. Jobanyń tujyrymdamasy men memlekettik-jekeshelik áriptestik sharty jobasynyń saraptamasy kezeńderi alyp tastalady. Bul memlekettik-jekeshelik áriptestik jobalaryn ázirleý merzimin 7-den 3 aıǵa deıin qysqartýǵa múmkindik beredi.
«Jańalyqtardyń biri «baǵdarlamalyq memlekettik-jekeshelik áriptestikti» engizý bolyp tabylady. Nátıjesinde memlekettik-jekeshelik áriptestik rásimderi neǵurlym qysqa jáne bıznes úshin qoljetimdi bolady»,-deıdi vedomstvo basshysy.