Bıýdjettik baǵdarlamalar nátıjeli bolmaǵan jaǵdaıda birinshi basshylar jaýapkershilikke tartylady
Bul týraly búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine bıýdjet zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasyn tanystyrý kezinde QR Ulttyq ekonomıka mınıstri Erbolat Dosaev málim etti.
Mınıstrdiń sózine qaraǵanda, nátıjelerge qol jetkizýge nazar aýdara otyryp, bıýdjet jobasy men onyń atqarylýy týraly esepti usyný maqsatynda Parlamentte respýblıkalyq bıýdjet jobasyn qaraý kezinde strategııalyq josparlardyń josparlanǵan nysanaly ındıkatorlary (bıýdjettik baǵdarlamalardyń túpkilikti nátıjeleri) týraly bıýdjettik baǵdarlamalar ákimshileriniń basshylaryn tyńdaý kózdelgen. Budan bólek qujatta respýblıkalyq bıýdjettiń atqarylýy týraly jyldyq esepte bıýdjettik baǵdarlamalardyń tikeleı jáne túpkilikti nátıjelerine qol jetkizý týraly aqparatty kórsetý, sondaı-aq Parlamentte respýblıkalyq bıýdjettiń atqarylýy týraly jyldyq esepti talqylaý kezinde bıýdjettik baǵdarlamalardyń tikeleı jáne túpkilikti nátıjelerine qol jetkizý týraly bıýdjettik baǵdarlamalar ákimshileriniń basshylaryn tyńdaý eskerilgen.
«Qarajatty qaıta bólý quqyǵyn berýge baılanysty bıýdjettik baǵdarlamalardyń tikeleı jáne túpkilikti nátıjelerine qol jetkizilmegeni úshin memlekettik organdardyń birinshi basshylary men bıýdjettik baǵdarlamalar basshylarynyń tártiptik jaýapkershiligi engizildi. Bul rette «bıýdjettik baǵdarlamalardyń atqarylmaýy» jáne «bıýdjettik baǵdarlamalardyń bıýdjet qarajatynyń ıgerilmeýi» degen uǵymdar engiziledi»,-dedi E. Dosaev.