Bıýdjettik baǵdarlamalar ákimshileri konkýrstardy ótkizýdi sozbalańǵa salyp otyr - Álıhan Smaıylov
«Esepti aıdy bıýdjet qarajatyn ıgerý úshin uıymdastyrý is-sharalaryn ótkizý kezeńi dep aıtýǵa bolady. Memlekettik satyp alý protsedýralarynyń ońaı qoldanylýy bıýdjet qarajatyn ıgerýde negizgi faktor bolyp tabylady. Sondyqtan memlekettik satyp alý zańnamasynyń protsedýralary tolyǵymen elektrondyq formatqa aýysyp, júıeniń ashyqtyǵyn qamtamasyz etýge jaǵdaı jasaldy. Biraq, bıýdjettik baǵdarlamalar ákimshileri tarapynan áli de bolsa konkýrstardy ótkizý, qosymsha sharttardy qabyldaý jumystaryn sozbalaý baıqalýda», - dedi Á.Smaıylov.
Sonymen qatar, mınıstr dereginshe, memlekettik bıýdjettiń shyǵystary esepti kezeńde, ıaǵnı qańtarda 999 mlrd teńgeni qurady. Ótken jyldyń osyndaı kezeńimen salystyrǵanda ol 112,2 paıyzǵa ósip otyr. Respýblıkalyq bıýdjet shyǵystary 951 mlrd teńgege atqaryldy. Onyń 95 paıyzy aǵymdaǵy shyǵystarǵa tıesili.
«Bıýdjet qarajaty 47 mlrd teńgege atqarylmady. Onyń 10 mlrd teńgesi únemdeý bolady. Al, ıgerilmeý somasy 37 mlrd teńgeni qurady. Negizgi sebepter: konkýrstyq rásimderdi uzaq jáne ýaqtyly ótkizbeý, oryndalatyn jumystardyń bekitilgen kesteden qalýy, qazynashylyq organdaryna tirkeýge sharttar men qosymsha kelisimderdi kesh usyný», - dedi mınıstr.
Onyń sózine qaraǵanda, jergilikti bıýdjetterdiń shyǵystary 190 mlrd teńgege ıgerildi. 16 mlrd teńge oryndalmady. Óńirlerdiń shottaryndaǵy qaldyqtar 175 mlrd teńgeni qurap, jyl basymen salystyrǵanda eki ese ósti. Ósim barlyq óńirlerde oryn aldy.
