Bıýdjetti sapasyz josparlaǵandarǵa jaýapkershilik engiziledi - Qanat Baıedilov
«Sapasyz josparlaýǵa qatysty másele jyl saıyn kóteriledi. Depýtattar da bul máseleni kóterip jatady. Ol talqylaný ústinde jáne taıaý bolashaqta sapasyz josparlaýǵa jaýapkershilik engiziletin bolady», - dedi ol BAQ ókilderiniń saýalyna oraı.
Sonymen qatar ol salyq salýdyń progressıvti shkalasyn engizý elimizde josparlanyp otyrmaǵandyǵyn basa aıtty.
«Bizde salyq saıaatyn Ulttyq ekonomıka mınıstrligi qalyptastyrady. Sondyqtan oǵan qatysty saýaldy olarǵa qoıǵan jón bolar. Degenmen, taıaý ýaqytta mundaı shkala engizý josparlanyp otyrǵan joq», - dedi Qanat Baıedilov.
Munan bólek, vıtse-mınıstr elimizde júrgiziletin jeke tulǵalarǵa salyqtyq raqymshylyqtyń bıýdjetke aıta qoıarlyqtaı zııany joq ekendigin atap ótti.
«Shyndyǵyna kelgen memleket jeke tulǵalarǵa raqymshylyq jasaýǵa sanaly túrde baryp otyr jáne raqymshylyqqa baılanysty bıýdjetke túsimderdiń belgili bir bóligi azaıady. Degenmen, saralap qaraıtyn bolsaq, jyl saıyn memleketke jeke tulǵalar tarapynan shamamen 60 mlrd teńge salyq túsedi. Bul jalpy kiristiń aıasynda mardymsyz soma, tipti 1 paıyzǵa da jetpeıdi. Sondyqtan salyqtyq raqymshylyq jasaýdan bıýdjetke qandaı da bir zııan kórip otyrǵanymyz joq», - dedi ol.
