Bıýdjetti ońtaılandyrý aıasynda birqatar áleýmettik baǵdarlamalar ózgeriske ushyraıdy - G. Qaraǵusova
Eske salaıyq, fraktsııa otyrysynda «2015-2017 jyldarǵa arnalǵan respýblıkalyq bıýdjet týraly» zańǵa ózgerister men tolyqtyrýlar engizý týraly» zań jobasy talqylanǵan bolatyn.
Komıtet tóraıymynyń aıtýynsha, keshe el Úkimeti men Respýblıkalyq bıýdjet jónindegi komıssııanyń otyrysy ótip, onda Elbasy tapsyrmasyna sáıkes, 2015 jyldyń bıýdjeti naqtylaý, aldaǵy úsh jyl boıynsha bıýdjet parametrlerine tıisti ózgerister jasaý máselesi talqylanǵan. Tutastaı alǵanda bıýdjettiń parametrlerin ózgertýdiń negizgi sebebi munaıǵa álemdik baǵanyń qubylýy bolyp otyr. Sonymen qatar, ІJÓ ósimi de tómendeıtini boljanǵan, bul da bıýdjet shyǵystaryn ońtaılandyrýǵa sebep bolyp tabylady.
«Bıýdjet shyǵystaryn qysqartýdyń negizgi baǵyttary boıynsha jalpy somasy 690 mıllıard teńge qamtylǵaly otyr. Bul rette birinshiden, 2015 jylǵa josparlanǵan ári bastalmaǵan jobalar men baǵdarlamalar qysqartylady ári olardy júzege asyrý merzimi 2016 jylǵa shegeriledi. Budan keıingi baǵyt, shyǵyny joǵary jáne júzege asyrý merzimi uzaq jobalarǵa qatysty. Ondaı jobalardy júzege asyrý boıynsha basty aýyrtpashylyq kelesi jylǵa aýystyrylady. Tıimdiligi tómen baǵdarlamalar men jobalar da ońtaılandyrylady», - dedi G. Qaraǵusova.
Onyń sózine qaraǵanda, depýtattardyń usynystary boıynsha issapar shyǵyndary, saraptamalyq jáne konsaltıngtik zertteýler shyǵyndary, aqparattandyrý, ákimshilendirý salasyndaǵy jekelegen shyǵyndar qysqartylady. Al áleýmettik salada tórt baǵyt boıynsha shyǵystar úlesi ózgerissiz qalmaq, ıaǵnı 39-40 paıyz bekitilgen bastapqy bıýdjet deńgeıinde saqtalady.
«Sonymen qatar, birqatar áleýmettik baǵdarlamalardy júzege asyrý baǵyty ózgeredi. Atap aıtqanda, «Jumyspen qamtý jol kartasy-2020» baǵdarlamasynyń tıimdiligin arttyrý ózekti bola túsedi. Bul rette, birinshi baǵyt - «Nurly jol» baǵdarlamasy aıasynda ınfraqurylymdyq jobalardy júzege asyrýǵa halyqtyń nysanaly toptaryn jumyldyrý kózdeledi. Ekinshi baǵyt - óńirlik damý baǵdarlamasynyń shyǵystary birshama qysqartylady. Úshinshi - aýyldaǵy kásipkerlikti damytý «Jol kartasy-2020» baǵdarlamasymen úılestirilip, transformatsııalanady. Tórtinshi baǵyt - jergilikti atqarýshy bıliktiń nysanaly baǵdarlamalary esebinen jumysshylardy oqytyp, jumysqa ornalastyrýdy qamtamasyz etý usynylady», - dedi G. Qaraǵusova.