Bıýdjetti naqtylaǵanda Arys - Shardara avtojolyndaǵy aınalma jol qurylysyna qarjy bólý eskerilse- Q. Aıtahanov
ASTANA. Qyrkúıektiń 9-y. QazAqparat /Qanat Mámetqazyuly/ - 2010 jylǵy bıýdjetti naqtylaǵanda Arys - Shardara avtojolyndaǵy aınalma jol qurylysyna qarjy bólý eskerilse ıgi. Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Qýanysh Aıtahanov osylaı málim etti.
Senatordyń aıtýynsha, Ońtústik Qazaqstan oblysynda salynyp jatqan Kóksaraı sý rettegishiniń qurylysyna baılanysty Arys - Shardara avtokólik jolynyń 20 shaqyrym bóligi sý astynda qalatyny anyqtalǵan. Osyǵan oraı, aınalma jol salý týraly sheshim qabyldanǵan bolatyn. «Qazirgi kezde atalǵan jol qurylysy qyzý qarqynmen júrgizilýde. Jol qurylysynyń jalpy smetalyq quny 2 mlrd. 195,2 mln. teńgeni quraıdy. Ol respýblıkalyq bıýdjetten úsh jylǵa bólingen: 2009 jyl - 354 mln. teńge, 2010 jyly - 1 mlrd. 249 mln. teńge, 2011 jyly 591 mln. teńge. Búgingi tańda, aǵymdaǵy jyldyń qarjysy tolyǵymen ıgerildi. Qosymsha qarjy bólinse jol qurylysyn osy jyly tolyǵymen aıaqtaýǵa múmkindik bar», deı kele Q. Aıtahanov, bıylǵy jylǵy respýblıkalyq bıýdjetti naqtylaý kezinde atalǵan jol qurylysyn aıaqtaý úshin 2011 jylǵa josparlanǵan 591 mln. teńge qarjyny 2010 jylǵa bólýdi surady. «Bul jol qatynasynan qınalyp jatqan oblystyń Ordabasy, Arys, Shardara aýdandarynyń 240 myńnan astam halqynyń jaǵdaıyn jaqsartqan bolar edi», dedi depýtat.
