Bıýdjetti qaraý kezinde tek memlekettik múdde ústem bolýy tıis - Toqaev
2019-2021 jyldarǵa arnalǵan respýblıkalyq bıýdjetti qalyptastyrý týraly, sondaı-aq avıatsııa qaýipsizdigi salasyndaǵy halyqaralyq eki kelisimdi ratıfıkatsııalaý máseleleri jónindegi zań jobalaryn depýtattardyń qaraýyna engizý usynyldy.
Otyrysta depýtat Olga Perepechına «Qazaqstan Respýblıkasynyń Ulttyq qorynan 2019-2021 jyldarǵa arnalǵan kepildendirilgen transfert týraly» jáne «2019 - 2021 jyldarǵa arnalǵan respýblıkalyq bıýdjet týraly» zań jobalarynyń Senat komıtetteri men jumys toptarynda talqylaný barysy týraly habardar etti.
Q. Toqaev Elbasynyń taıaýdaǵy Qazaqstan halqyna Joldaýyndaǵy tapsyrmalaryn qarjylyq turǵyda qamtamasyz etý elimizdiń úsh jyldyq bıýdjet jobasyna qosylǵanyn atap ótti. «Adamdar jaqsy ózgeristerdi naqty seziný úshin Memleket basshysynyń tapsyrmalaryn laıyqty deńgeıde oryndaý - bizdiń basty maqsatymyz», - dep atap ótti Senat basshysy. Bıýdjettiń shyǵys bólikterin ulǵaıtý týraly depýtattardyń usynystary týraly aıta kelip, Q.Toqaev memleket qarjysyn tıimdi paıdalanýdy qamtamasyz etý týraly Elbasynyń alǵa qoıǵan mindetin eske saldy.
Senat Tóraǵasynyń pikirinshe, bizdiń azamattarymyzdy tolǵandyratyn áleýmettik-ekonomıkalyq kókeıkesti máselelerdiń sheshimi men aımaqtyq jáne mekemeler múddeleriniń arajigi aıqyn bolýy tıis. Respýblıkalyq bıýdjet eń aldymen bizdiń azamattarymyzdyń ál-aýqatynyń arta túsýin qamtamasyz etýi tıis. Q.Toqaev ol úshin basymdyqtardy aıqyndaý qajet ekenine nazar aýdardy. Senat Tóraǵasy atap ótkendeı, taıaýda ótken Qaýipsizdik Keńesiniń otyrysynda kommýnaldyq qyzmet kórsetý baǵasynyń negizsiz ósýi men bıýdjet qarjysyn óz maqsatynan basqa salaǵa paıdalaný týraly qatań aıtyldy.
Q.Toqaevtyń aıtýynsha, shynaıy nıet pen bilikti sheshim arqyly únemdeý jáne qolda bar qorlardy paıdalaný esebinen birqatar máselelerdiń sheshimin tabýǵa bolady. Tóraǵa osyǵan baılanysty parlamentshilerdi bıýdjettiń shyǵys bóligin ulǵaıtýǵa aparatyn barlyq usynystardy muqııat oılastyrýǵa shaqyrdy.
«Tek memlekettik múdde turǵysynan qaraý kerek, komıtetter men depýtattardyń barlyq usynystary tek osy kózqarastan qaralýy tıis», - dedi Q.Toqaev.
