Bıýdjetten tegin medqyzmetke jumsalatyn shyǵynnyń 27%-y qysqarady — zań jobasy
ASTANA. KAZINFORM — Densaýlyq saqtaý mınıstrligi mindetti áleýmettik medıtsınalyq saqtandyrý júıesin jetildirýge arnalǵan zań jobasyn kópshilik talqylaýyna shyǵardy.
Zań jobasynda birneshe medıtsınalyq qyzmetke jumsalatyn bıýdjet qarajatyn qaıta baǵyttaýdy kózdeıtin birneshe norma usynylyp otyr. Mysaly qazir MÁMS júıesinen tys qalyp otyrǵan bir mıllıon adam úshin jergilikti bıýdjetter esebinen jarna tóleý usynylyp otyr.
— Búgingi tańda 16,7 mln adam (83%) saqtandyrylǵan. Onyń ishinde 11,9 mln adam (58,9%) halyqtyń jeńildikti sanattaryna jatady. Olar úshin MÁMS jarnalaryn memleket tóleıdi. Sonyń ózinde shamamen 3,5 mln (17,5%) adam MÁMS júıesinen tys qaldy. 2,5 mln adam ómir súrý deńgeıi qolaıly jáne qanaǵattanarlyq azamattar, 1 mln adam — áleýmettik salamattylyqtyń daǵdarystyq (D) jáne shuǵyl (E) deńgeılerine jatatyn, ıaǵnı tabysy tómen, otbasynyń negizgi qajettilikterin qanaǵattandyrýǵa múmkindigi joq azamattar. Bul azamattardyń jarnalaryn medıtsınalyq kómekke júginý faktisi boıynsha jergilikti bıýdjetter esebinen tóleý usynylady, — dep jazylǵan baspasóz relızde.
Sondaı-aq, 2026 jyldan bastap áleýmettik máni bar aýrýlardyń tizbesindegi syrqatqa shaldyqqany týraly kúdik týyndaǵan jaǵdaıda tegin konsýltatsııalyq-dıagnostıkalyq kómek kórsetý josparlanyp otyr. ıAǵnı, jańa zań osyndaı azamattarǵa tegin dıagnostıkadan ótýge múmkindik beredi.
Bul týberkýlez jáne AITV-ınfektsııasynan basqa áleýmettik máni bar aýrýlardy tegin dıagnostıkalaýǵa jol ashady.
— 2027 jyly medıtsınalyq-sanıtarııalyq alǵashqy kómekti Tegin medıtsınalyq kómektiń kepildi kólemi paketinen MÁMS paketine aýystyryla otyryp, shyǵystardyń araqatynasy TMKKK-ge 30% jáne MÁMS-ke 70% bolatyn qarjylandyrýdyń basym saqtandyrý modeline kóshý jónindegi jumys aıaqtalady dep josparlanýda. Bıyl shyǵystardyń araqatynasy TMKKK-ǵa 57%-dy jáne MÁMS 43%-dy quraıdy. Osylaısha mindettemelerdiń negizgi bóligi densaýlyq úshin ortaq jaýapkershilik qaǵıdattaryn iske asyrý úshin saqtandyrý júıesine kóshiriletin bolady, — dep jazady mınıstrlik ókilderi.
Resmı málimetke sensek, MÁMS-ke aılyǵy joǵary qazaqstandyqtardan 250 mlrd teńge túspeı jatyr.
Eske salsaq, osyǵan deıin azamattar «Áleýmettik ámııan» elektrondyq servısi arqyly tegin dári-dármek ala bastaǵany habarlandy.