Bıýdjetten sport túrlerine qansha qarajat bólinedi
ASTANA. KAZINFORM – Týrızm jáne sport vıtse-mınıstri Serik Jarasbaev elimizde sport túrlerin damytý úshin qansha qarajat jumsalatynyn málim etti.
«Sport salasyna jalpy oblystyq, jergilikti jáne respýblıkalyq bıýdjetterdi qosa alǵanda shamamen 290 mlrd teńge bólinedi», - dedi vıtse-mınıstr Májilistiń Áleýmettik-mádenı damý komıteti otyrysynan keıin.
Onyń atap ótýinshe, bıyl qarjylandyrý somasy buǵan deıin belgilengen deńgeıde qalady. Biraq memleket tarapynan qarjylandyrylatyn sport túrleriniń sany qysqartylady.
«Biz qarajatty shashyp jibermeý maqsatynda ony shoǵyrlandyryp, basymdyqqa ıe sport túrlerine jumsaǵymyz keledi. Bul olımpıadalyq sport túrimen aınalysatyndar sanyn arttyrady, olımpıadalyq sport túrleri ishindegi básekelestikti jandandyrady. Búginde olımpıadalyq sport túrlerinen ketip jatqandardy da kórip otyrmyz. Jalpy, bólingen qarjynyń jalpy somasy qalady. Ol olımpıadalyq sport túrleri arasynda bólinedi», - dedi Serik Jarasbaev.
Aıta keteıik, Májilistiń áleýmettik-mádenı damý komıtetinde «Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha ózgerister men tolyqtyrýlar engizý, sondaı-aq normalardy shekten tys (shekten tys) zańnamalyq retteýdi alyp tastaý týraly» zań jobasy talqylandy.
