Bıýdjetten oblystarǵa bólinetin sýbventsııalarǵa jańa ádisteme ázirlenip jatyr

ASTANA. KAZINFORM — Kúzde Parlamentte «Jalpy sıpattaǵy transfertter týraly» zań jobasy qaralady.

Bul týraly Májilis tóraǵasynyń orynbasary Danııa Espaeva málim etti.

— Kúzde Májiliste aldaǵy úsh jyldyq «Jalpy sıpattaǵy transfertter týraly» jáne «Respýblıkalyq bıýdjet týraly» zańdardy qaraımyz. Bul zańdar osy jyldyń naýryz aıynda Prezıdent qol qoıǵan jańa Bıýdjet kodeksiniń normalary eskerile otyryp, daıyndalady. Qazir Úkimet Jalpy sıpattaǵy transfertterdi, ıaǵnı, respýblıkalyq bıýdjetten oblystyq bıýdjetterge jiberiletin sýbventsııalardy aıqyndaýdyń jańa ádistemesin ázirlep jatyr. Sondyqtan, qazirden jańa tásilder bıýdjetaralyq qatynastardy sheshýge, ózekti suraqtardy anyqtaýǵa qanshalyqty múmkindik beretinin túsinýimiz kerek. Óıtkeni odan keıin Úkimet kemshilikterdi joıý jónindegi sharalardy ázirlep úlgerýi tıis, — dedi D. Espaeva Parlament Májilisinde «Jalpy sıpattaǵy transfertterdi aıqyndaý jónindegi jańa tásilder» taqyrybyndaǵy Úkimet saǵatynda.

Osy oraıda ol elimizde Atyraý oblysy, Astana jáne Almaty qalalary donor dep tanylǵanyn eske saldy. Qalǵan on jeti óńir sýbventsııalyq, olar óz shyǵystaryn óteý úshin respýblıkalyq bıýdjetten jalpy sıpattaǵy transfertterdiń edáýir kólemin alady.

Eske salsaq, bıyl naýryz aıynda Memleket basshysy jańa Bıýdjet kodeksine qol qoıdy.