Bıýdjetten bólingen qarajatty tıimdi ıgerý ekonomıkanyń 1 paıyzdyq ósimin qamtamasyz etedi - Elbasy
ASTANA. QazAqparat - Bıylǵy jyly atqarylatyn sharalarǵa bıýdjetten bólingen qarajatty tıimdi ári tolyq ıgerý ekonomıkanyń 1 paıyzdyq ósimin qamtamasyz etedi. Búgin Aqordada ótken Úkimettiń keńeıtilgen otyrysynda Elbasy Nursultan Nazarbaev osylaı málim etti
«Bıylǵy jyly atqarylatyn sharalar úshin bıýdjetten bólinetin qarajatty tolyq ári tıimdi ıgerý 2016 jyly ekonomıkalyq belsendilikti yntalandyratyn bolady. Sonymen qatar, jumyspen qamtýdy qamtamasyz etip, ekonomıkanyń 1 paıyzdyq ósimin qamtamasyz etýge de septigin tıgizedi», - dedi Nursultan Nazarbaev.
Sonymen qatar, Elbasy qalyptasqan syrtqy jaǵdaılardy eskere kele, Úkimetke qarajattardyń shyǵystaryna qatań baqylaý jasaýdy tapsyrdy. Bul rette Memleket basshysy tapsyrmalardy óńirlerde júzege asyrýdyń mańyzdylyǵyna nazar aýdardy. Sondaı-aq, Prezıdent oblys ákimderine de bólinip otyrǵan qarajattyń tıimdi ıgerilýi úshin barlyq resýrstardy jumyldyrý qajettiligin atap ótti.
