Bıýdjetten balalardy oqytýǵa bólinetin qarajatty qamtıtyn bilim berý shoty engiziledi

NUR-SULTAN. QazAqparat – Bıýdjetten balalardy oqytýǵa bólinetin qarajatty qamtıtyn bilim berý shoty engiziledi. Bul týraly Úkimet otyrysynda QR Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Memleket basshysy «Qolaıly mektep» ulttyq jobasyn iske asyrý týraly tapsyrma berdi. Ulttyq jobanyń aıasynda 800 myńnan astam oqýshy orny salynyp, úsh aýysymdy mektepter men apatty jaǵdaıdaǵy mektepterdiń problemasy tolyǵymen sheshedi. «Qolaıly mektep» jobasy aıasynda biryńǵaı qurylys jáne jabdyqtaý standarty engiziledi. Joba aıasynda ashylatyn mektepter zamanaýı pándik kabınettermen tolyq qamtamasyz etilip, oqý alańdary ulǵaıtylady. Bastaýysh synyptarǵa, joǵary synyp oqýshylyryna da jeke bloktar qarastyrylady. Sáıkesinshe olar bólek sportzaldarmen, bólek ashanalarymen qamtamasyz etiledi», - dedi ol.

Mınıstrdiń aıtýynsha, kelesi jyly buryn bolmaǵan kólemde mektepterdi salý bastalady. Mysaly tek ǵana elordada osy jobanyń aýqymynda árqaısysy 2 myń orynǵa arnalǵan 20 jańa mekteptiń qurylysyn bastaý qala ákimdigimen birge josparlanyp otyr.

«Prezıdenttiń tapsyrmasyna sáıkes áleýmettik turǵydan osal otbasyda turatyn balalar mektep formasymen tegin qamtylatyn bolady. Bıýdjetten balalardy oqytýǵa bólinetin qarajatty qamtıtyn bilim berý shoty engiziledi», - dedi Ashat Aımaǵambetov.