Bıýdjetten aqsha bólingen joq: Kólik mınıstri QTJ eks-basshysynyń synyna jaýap berdi

ASTANA. KAZINFORM – Kólik mınıstri Marat Qarabaev Úkimet otyrysynan keıin ótken baspasóz máslıhatynda «Qazaqstan temirjoly» ulttyq kompanııasynyń burynǵy basshysy, kásipker Erlan Atamqulovtyń synyna jaýap berdi.

«QTJ-nyń burynǵy basshysy Erlan Atamqulov You Tube arnalardyń birine bergen suhbatynda sizdiń sózińizge silteme jasaı otyryp, memleket bir shaqyrym temirjol salýǵa, 4,3 mln dollar bólip jatqanyn, mundaı shema arqyly salynatyn ár shaqyrym temirjoldan keminde 2,3 mln dollar aqsha jymqyrýǵa bolatynyn aıtty. Osy synǵa ne dep jaýap beresiz? Áńgime qandaı joba týraly bolyp otyr?» - dep surady jýrnalıst.

Marat Qarabaev atalmysh suhbatty kórmegenin, sondyqtan naqty qandaı joba týraly aıtylyp otyrǵanyn bilmeıtinin aıtty. 

«Jalpy qazirgi tańda salynyp jatqan jańa temirjoldar respýblıkalyq bıýdjetten, ıaǵnı mınıstrlik tarapynan qarjylandyrylyp otyrǵan joq. Sondyqtan ol synǵa múldem keri jaýap beremin. Mınıstrlik buǵan aqsha bólip otyrǵan joq. 

Respýblıkalyq bıýdjetten «Dostyq – Moıynty», «Darbaza – Maqtaaral» jáne «Baqty – Aıagóz» baǵytyndaǵy joldardy salýǵa aqsha bólinbegen. 

Bulardyń barshasy QTJ-nyń túrli qarjy kózderinen alynyp jatyr. Biraq respýblıkalyq bıýdjetten aqsha bólinip otyrǵan joq», - dedi mınıstr.